“Мюнхен-1972”, “Монреаль-1976” олимпийн наадам, “Тегеран-1973” ДАШТ-ий алтан медальт, ОХУ-ын нэрт бөх Иван Ярыгиний нэрэмжит Гранпри тэмцээн өчигдөр ОХУ-ын Красноярск хотод энэ сарын 24-27 өдрүүдэд явагдаж дууслаа.
Манай сайт чөлөөт бөхийн “Красноярск-2019” Гранпри тэмцээнд медаль хүртсэн монгол тамирчдынхаа барилдаануудыг бичлэгийг цувралаар хүргэж байгаа билээ. Энэ удаа эмэгтэйчүүдийн -57кг жинд барилдсан бөхчүүдийнхээ бүх барилдааны бичлэгийг түүвэрлэн хүргэж байна. Энэ жинд манай 2 бөх буюу МУГТ С.Цэрэнчимэд, Б.Хонгорзул нар барилдсан юм.
30 дахь удаагийн Иван Ярыгиний нэрэмжит Гранпригийн гурав дахь өдөр эмэгтэйчүүдийн 57 кг-ын жинд насанд хүрэгчдийн ДАШТ-ий алт, мөнгө, 23 хүртэлх насны ДАШТ-ий хүрэл, залуучуудын ДАШТ-ий алт, өсвөр үеийн ДАШТ-ий хүрэл медальт, “Алдар” спорт хорооны тамирчин, Монгол Улсын гавьяат тамирчин Сүхээгийн Цэрэнчимэд алтан медаль хүртэж, Монгол Улсын төрийн дууллаа эгшиглүүлэв. С.Цэрэнчимэд “Бага дэлхийн аварга”-аас манайхны 13 дахь алтан медалийн эх орондоо авчирлаа.
Тэрбээр тус тэмцээнээс медалийн иж бүрэн цуглуулгатай болж байгаа бөгөөд 2014 онд мөнгө, 2016 онд хүрэл медаль хүртэж байв.
С.Цэрэнчимэд Красноярскт шөвгийн наймд ДАШТ-ий хүрэл медальт АНУ-ын Бека Литерсийг 9:3-аар яллаа.
Өсвөр үеийн ДАШТ-ий хүрэл медальт, Баянхонгор аймаг, “Хонгор нутаг” дэвжээний тамирчин 18 настай Б.Хонгорзул шөвгийн наймд Узбекстаны Севара Эшмуратоватай барилдаж цэвэр ялсан юм.
Хагас шигшээд МУГТ С.Цэрэнчимэд өнгөрсөн жилийн 23 хүртэлх насны дэлхийн аварга Норвегийн Грейс Булланыг цэвэр яллаа.
Харин шигшээ барилдаанд өнгөрсөн жилийн Оросын аварга Ольга Хорошавцеваг 10:5-аар ялж аваргын алтан медалийг энгэртээ зүүлээ.
Энэ жинд барилдсан өсвөр үеийн ДАШТ-ий хүрэл медальт, Баянхонгор аймаг, “Хонгор нутаг” дэвжээний тамирчин 18 настай Б.Хонгорзул хүрэл медалийн төлөөх барилдаанд өнгөрсөн жилийн дэлхийн дэд аварга Болгарын Бильяна Дудоватай тун зоримог дайчин барилдсан ч 9:13-аар ялагдлаа.
