Жүдо бөхийн насанд хүрэгчдийн дэлхийн аварга шалгаруулах тэмцээний эхний өдрийн хэсгийн барилдаанууд өндөрлөлөө.
Дэлхийн аварга шалгаруулах тэмцээний эхний өдөр уламжлал ёсоор хамгийн хөнгөн жин болох эрэгтэйчүүдийн -60кг, эмэгтэйчүүдийн -48кг жингүүдийн барилдаан явагдаж манай улсаас дөрвөн бөх хүч үзлээ. Өнөөдөр барилдсан бөхчүүдээс эрэгтэйчүүдийн -60кг жингийн С хэсэгт Парисын их дуулгын хүрэл медальт Э.Ариунболд аваргын алтан медалийн төлөө барилдахаар тунан үлдээд байна.
Тэрээр эхний тойрогт гоц мөргөж улмаар Чехийн Д.Пулкрабекийг хоёр ваза-ари үнэлгээгээр цэвэр, гуравдугаар тойрогт Нидерландын Т.Цакадоег торгуулиар цэвэр, Хэсгийн аваргын төлөө Италийн А.Пантаног мөн цэвэр ялж хагас шигшээд тунан үлдсэн юм. Хагас шигшээ барилдаанд тэмцээнийг зохион байгуулагч эзэн орны Д.Баратовтой нийт найман минутын барилдаан хийж торгуулиар цэвэр яллаа.
Ийнхүү ОУХМ Э.Ариунболд аваргын алтан медалийн төлөө олимпын алт, хүрэл, дэлхийн гурван удаагийн аварга Японы домогт Такато Наохисатай барилдахаар боллоо.
