Хэдхэн хоногийн дараа /зургаадугаар сарын 6-ны өдөр/ жүдо бөхийн дэлхийн аварга шалгаруулах тэмцээн хөшгөө нээнэ. 

Энэ удаагийн ДАШТ-д 132 орны 706 тамирчин оролцох урьдчилсан мэдүүлгээ өгөөд байна. Үүний дотор Монгол, Япон, ОХУ, Унгар, Бразил, АНУ зэрэг зургаан улс хамгийн олон хүнтэй буюу 18 тамирчин бүхий багаа илгээж байна. 

Манай баг, бүрэлдэхүүний тухайд ахлах дасгалжуулагч МУГТ, МУГД Х.Болдбаатар, дасгалжуулагч ОУХМ П.Нямлхагва, ОУХМ Ч.Болдбаатар, Мансоури Касваей Мохаммад, МУГТ М.Бундмаа нарын удирдлага дор дараах тамирчид оролцоно. 

Эрэгтэй

• ОУХМ Л.Өнөболд -60 кг
• ОУХМ Г.Хэрлэн -66 кг
• ОУХМ Ё.Басхүү -66 кг
• ОУХМ Ц.Цогтбаатар -73 кг
• Саейд Моллаей -81 кг
• ОУХМ Г.Алтанбагана -90 кг
• ОУХМ Л.Отгонбаатар -100 кг
• ОУХМ Б.Гончигсүрэн -100 кг
• ОУХМ Ө.Дүүрэнбаяр +100 кг

Эмэгтэй

• МУГТ М.Уранцэцэг -48 кг
• ОУХМ Г.Наранцэцэг -48кг
• ОУХМ Л.Сосорбарам -52 кг
• ОУХМ Б.Хорлоодой -52 кг
• МУХБ, МУГТ Д.Сумъяа -57 кг
• ОУХМ Б.Ганхайч -63 кг
• ОУХМ Ц.Энхчимэг -70 кг
• ОУХМ Б.Эрдэнэт-Од -78 кг
• ОУХМ А.Адьяасүрэн +78кг 

ДАШТ-д түрүүлсэн тамирчинд дэлхийн чансааны 2000 өгөх тул тамирчид чансаагаа ахиулаад зогсохгүй олимпын эрх авах боломж нээгдэж ч болох юм. Мөн түүнчлэн 2021 оны жүдо бөхийн дэлхийн аварга шалгаруулах тэмцээн найман өдрийн форматаар буюу Токиогийн олимпын наадмын хөтөлбөртэй ижил байна. Өөрөөр хэлбэл тэмцээний өдөр бүр хоёр жингийн барилдаан (нэг эрэгтэй, нэг эмэгтэй) явагдах бөгөөд сүүлчийн өдөр холимог багийн тэмцээн (эрэгтэй 73, 90 ба +90, эмэгтэй 57, 70, +70 кг ангилал) явагдаж тэмцээн өндөрлөнө.