Жүдо бөхийн насанд хүрэгчдийн Европын аварга шалгаруулах тэмцээний эхний өдрийн тоймыг толилуулж байна.  

45 орны 359 жүдоч барилдаж буй Европ тивийн жүдо бөхийн шилдгүүдийн цугларалт болох энэхүү тэмцээнд долоон жинд дэлхийн чансааг тэргүүлэгч барилдах бол найман жинд жин тус бүрийн дэлхийн чансааны №2-т эрэмбэлэгдэх тамирчид зодоглож байна. Дэлхийн чансааны шилдгүүдийн мэдээллийг ЭНД дарж үзнэ үү. 

Тэмцээний эхний өдөр уламжлал ёсоор хөнгөн жингийн барилдаанууд явагдаж Франц улсын баг, тамирчид нэг алт, нэг мөнгө, хос хүрэл медаль хүртсэн амжилтаар тэргүүлсэн бол Итали улс нэг алт, нэг мөнгөн медаль хүртсэн амжилтаар удаалсан байна. Эхний өдрийн гол онцлог нь таван жинд таван өөр улсын тамирчид алтан медаль хүртлээ. 

Өчигдрийн барилдаанд үзэгчдийн анхаарлын төвд ороод байсан эмэгтэйчүүдийн -48кг жингийн финалд таамгийн дагуу дэлхийн чансааг тэргүүлэгч дэлхийн аваргын хүрэл, мастерсийн гурван удаагийн аварга Косовогийн Д.Красники болон дэлхийн чансааны хоёрт эрэмбэлэгдэж буй дэлхийн хошой аварга Украины Д.Билодид нар тунан үлдсэн юм. Гэвч тодорхойгүй шалтгааны улмаас /тэмцээний тайлбарлагчийн хэлснээр бол гэмтлийн улмаас/ Д.Билодид финалын барилдаанд гарч ирээгүй тул Д.Красники автомат ялалт авлаа.

Жич: Манай сайт жүдо бөхийн Европын аварга шалгаруулах тэмцээнийг гурав хоногийн турш шууд дамжуулан үзүүлэхээс гадна явцын тойм мэдээг шуурхай хүргэж байна.