Ковид-19 цар тахлын улмаас бүх төрлийн спортын арга хэмжээнүүд зохион байгуулагдалгүй багагүй хугацаа өнгөрсний эцэст таеквондогийн анхны "масктай" тэмцээн зохион байгуулагдаж эхэллээ. 

БНСУ-д хэдийгээр өдөр бүр халдварын шинэ тохиолдлууд илэрсээр байгаа ч харьцангуй хумигдаж буй энэ өдрүүдэд БНСУ-ын Соёл, Спорт, Аялал жуулчлалын сайдын нэрэмжит таеквондогийн өсвөрийн тэмцээн эхэллээ. Тэмцээнийг БНСУ-ын дунд болон ахлах сургуулийн таеквондогийн холбоо, Таебек хотын спортын хороо хамтран зохион байгуулж байна.  

Тус тэмцээн долоодугаар сарын 30-ны өдрөөс наймдугаар сарын 9-ний өдрийн хооронд тулаан, тоот дасгал (пүмсэ) төрлөөр зохион байгуулагдах юм. Тэмцээнийг зохион байгуулагчид аюулгүйн өндөр төвшинд зохион байгуулж байгаа ба тамирчид амны хаалт бүхий хамгаалалттай тулалдаж байгаа юм. 

Манай улсаас БНСУ-д таеквондогийн төрлөөр суралцаж буй ОУХМ Т.Энхжин энэ удаагийн тэмцээнд бэртлийн улмаас оролцож чадаагүй байна. Тэмцээний өмнөх бэлтгэлийн үеэр түүний хуучин гэмтэл сэдэрсэн байна.