Улаанбаатар хотын иргэд 40, 120 мянгатын иргэд шиг тэмцдэг байя

Иргэд өөрсдийн амьдарч буй орчноо хайрлан хамгаалж чадвал ямар ч эрх мэдэлтэй хүмүүсийн эсрэг байж чадна гэдгийг Улаанбаатар хотын 40 мянгат, 120 мянгатын оршин суугчдын тэмцлээс харж болно.

Нэхэн сануулахад 2016 онд Хичээнгүй сайд Б.Цэрэндоржийн гудамжны 1.7 га газрыг газар доорх үйлчилгээний байгууламжийн зориулалтаар НЗДТГ-т эзэмшүүлэх эрх олгосон байсан. Улмаар тус хэсэгт “Автомашингүй гудамж” байгуулж, газар доорх байгууламж болон үйлчилгээний зориулалтын барилга барих болсныг 40 мянгатын оршин суугчид тус гудамжийг унаган төрхөөр нь хадгалж үлдэхийг шаардаж, эсэргүүцлийн хөдөлгөөн өрнүүлсэн. Үүний хүчинд өнгөрсөн жил Нийслэлийн Засаг даргын захирамжаар унаган төрхийг нь хадгалан үлдэхээр болж, 400 сая төгрөгөөр тохижилтын ажил хийсэн билээ.

Тэгвэл өнгөрсөн баасан гарагаас Хан-Уул дүүргийн нэгдүгээр хорооны 120 мянгатын 15, 16 дугаар байрны оршин суугчид нийтийн эзэмшлийн ногоон байгууламж бүхий талбай болох 2194 мкв газраа "Номин холдинг" ХХК-иас алдахаас хамгаалан талбайгаа манан хонож байна. 2004 оноос хойш “Номин холдинг” ХХК тус газарт барилга барихыг санаархан иргэдтэй тэмцэлдэж иржээ.

“Номин холдинг” ХХК бидний тайван амьдрах нөхцөл боломжийг алдагдуулж байна. Бид нар үүнийг яаж ч байсан хүлээн зөвшөөрөхгүй, хуучин хэвээр нь ногоон байгууламжаар нь авч үлдэхийн тулд эцсээ хүртэл тэмцэнэ гэдгээ илэрхийлээд байгаа билээ.

Хотын дарга "Номин холдинг" ХХК-ийн газрын зөвшөөрлийг албан ёсоор цуцлахаас нааш 120 мянгатын иргэд тайван амарч чадалгүй гадаа талбайгаа харуулдсаар байх биз ээ.

Хэдийгээр хотын дарга өчигдөр оршин суугчидтай уулзан асуудлыг анхааралдаа авсан гэх боловч энэ сарын 30-нд "Номин холдинг" ХХК –иас иргэдтэй уулзах зар тарааж байгаа нь иргэдийн саналын авч ямар нэгэн аргаар санасандаа хүрэхээр зорьж буй нь харагдаж байна.

120 мянгатын иргэд өөрсдийн тэмцэлдээ үнэнч байж ногоон байгууламжаа, нийтийн эзэмшлийн газраа хэвээр хадгалж үлдэнэ гэдэгт итгэж байна.

Үндсэн хуулинд Монгол Улсын иргэн эрүүл, аюулгүй орчинд амьдрах эрхтэй. Уг эрх өдөр тутамд зөрчигдөж байгаа ч Улаанбаатар хотын иргэд 40, 120 мянгатын оршин суугчид шиг нийтийн эзэмшлийн талбайгаа, ногоон байгууламжаа, хүүхдийн тоглоомын талбайгаа хамгаалахын төлөө тэмцдэг байя.