Уншигч зохиолчдын “учирлын баяр” болж байна

Өнөөдөр Монголын зохиолчдын эвлэл, “Номын соёлт ертөнц” ТББ, Боловсрол, соёл, шинжлэх ухаан, спортын яам, Засгийн газрын хэрэгжүүлэгч агентлаг Соёл урлагийн газар, хамтран Монгол орон даяар  өрнөж буй “Үндэсний номын баяр”-ын нээлтийг төв талбайд хийлээ.

Энэ жил МЗЭ-ийн байгууллагын 90 жилийн ой тохиож байгаа агаад ойн арга хэмжээний хүрээнд энэхүү номын баярт зохиолч, яруу найрагчид, аймаг нийслэл, орон нутгийн номын сангууд, хэвлэн нийтлэгчид, хэвлэлийн газрын төлөөллүүд, ном эрдмийг эрхэмлэн дээдэлдэг монгол түмний хамгийн “оюунлаг” хүрээллийнхэн чуулж байна.

“Үндэсний номын баяр”-ын үеэр алдарт, Ардын уран зохиолчдод хүндэтгэл үзүүлэн тэдний уран бүтээлийг сурталчлахын зэрэгцээ Төрийн гурван удаагийн шагналт, Ардын уран зохиолч Ц.Дамдинсүрэнгийн мэндэлсний 110 жил, Төрийн шагналт, зохиолч, найруулагч, орчуулагч Э.Оюуны мэндэлсний 100 жил, төрийн хошой шагналт эрдэмтэн зохиолч Ш.Нацагдоржийн мэндэлсний 100 жил,  хүүхдийн нэрт зохиолч, яруу найрагч, Д.Содномын мэндэлсний 90 жил, Д.Нацагдоржийн нэрэмжит шагналт Б.Нямаагийн мэндэлсний 90 жилийн тэгш ой тохиож байгааг дашрамдуулан тэдгээр зохиолчдын намтар, уран бүтээлийн үзэсгэлэнг Д.Сүхбаатарын талбайд гаргах гэж байна.

Харин маргааш буюу номын баярын хоёр дахь өдөр “Болор цом”-ын тэргүүн шагналт яруу найрагчид болон зохиолчид өөрсдийн шүлэг яруу найргаа толилуулахаас гадна дууны уран бүтээлийг сурталчлах, МЗЭ-ээс хуучин нэн ховордсон номыг худалдаалах зэрэг олон сонирхолтой арга хэмжээ болох юм. Ийнхүү Морин цагт эхэлсэн Монголын утга зохиолын салбарынхны их баяр, зохиолч уншигчдын уулзахын баяр болсон Үндэсний номын баяр өргөн дэлгэр эхэллээ.