Цэргийн автобусыг дэлбэлж 40 гаруй цагдаа амиа алджээ

Энэтхэгийн хойд муж Кашмирт хагас цэрэгжүүлсэн цагдаа нарыг тээвэрлэж байсан цуваа руу тэсрэх бөмбөг ачсан машинаар мөргөж багадаа 40 цагдаа амиа алдсан байна.

Халдлагыг Пакистанд төвтэй Жайш-э-Мохаммад исламын хэт даврагсдын бүлэг үйлдсэн болохыг мэдэгджээ.

Уг халдлага нь 1989 оноос хойш Кашмир дахь Энэтхэгийн цэрэг цагдаагийн хүчин рүү халдсан хамгийн том дайралт юм.

Энэтхэг улсын Засгийн газар халдлага үйлдсэн Жайш-э-Мохаммад бүлгийн удирдагч Масуд Азарын эсрэг олон улсын хориг тавихыг дэлхийн нийтэд хандан уриалжээ.

Пакистан улсын зүгээс болсон явдалд гүнээ харамсаж байгаагаа илэрхийлсэн ч уг хэрэгт хариуцлага хүлээхээс татгалзсан байна.

Халдлага орон нутгийн цагаар пүрэв гарагийн 15 цагийн үед Кашмирын гол хот Сринагараас 20 км-т төв зам дээр болжээ.

Кашмирын хөндийг чиглэсэн 70 орчим тээврийн хэрэгслийн цуваанд 2,500 цэрэг, цагдаа явж байжээ.

Цуваанд байсан автобусыг мөргөсөн машинд 300-350 кг тэсрэх бодис ачсан гэж шинжээчид дүгнэсэн байна.

Дайралтын үеэр олон хүн хүнд шархадсан тул амь үрэгдэгсдийн тоо нэмэгдэж болзошгүй гэдгийг албаныхан анхаарууллаа.

Энэтхэгийн Ерөнхий сайд Нарендра Моди болон АНУ, НҮБ халдлагыг хурцаар шүүмжлэн буруушааж байна.

Эх сурвалж: www.bbc.com