Хүүхэд насны таргалалт 21 дүгээр зууны аюул болжээ

Дэлхийн эрүүл мэндийн байгууллагын зүгээс хүүхэд насандаа жингийн илүүдэлтэй байх тохиолдол улам бүр нэмэгдсээр байгаа гэдгийг анхаарууллаа. 21 дүгээр зуунд нийгмийн эрүүл мэндэд заналхийлж буй гол асуудлуудын нэг нь яах аргагүй насанд хүрээгүй хүүхдүүдийн дундах хэт таргалалт болж байна гэжээ.

Бүсчилбэл Карибын тэнгисийн эргийн Науру, Күк арлуудад 5-19 настай хүүхдүүдийн дунд хэт таргалах үзэгдэл хамгийн их байна. Харин Этиоп, Буркино Фасо зэрэг Африкийн орнуудад хамгийн бага гарчээ.

Одоогоор жингийн дутагдалтай хүүхдүүд жингийн илүүдэлтэйгээсээ их байгаа ч 2022 он гэхэд байр нь солигдож хэт таргалалттай хүүхдүүд хэт туранхай хүүхдүүдээс их болно гэж “The Lancet” сэтгүүлд 2017 онд нийтэлж байсан юм.

1975 онд дэлхийн хэмжээнд 5-19 насны жингийн илүүдэлтэй 11 сая хүүхэд тоологдсон бол 2016 онд 124 сая болж нэмэгджээ. Түүнчлэн 1990-ээд онд тав болон түүнээс бага насны хэт таргалалттай 32 сая хүүхэд байсан бол 2016 онд 41 сая болсныг Дэлхийн эрүүл мэндийн байгууллага мэдээлсэн юм.

Хэрэв энэ өсөлт үргэлжилсээр байх юм бол 2025 он гэхэд дэлхийн хэмжээнд тав болон таваас доош насны жингийн илүүдэлтэй хүүхдүүдийн тоо 70 сая болж нэмэгдэхээр байна. Номхон далайн арлын орнуудад 5-9 настай эрэгтэй, эмэгтэй хүүхдүүдийн 30 хувь нь илүүдэл жинтэй гэж бүртгэгджээ.

2016 онд хийсэн судалгаанаас харахад Монгол улсын хэмжээнд 5-9 настай хүүхдүүдийн дунд жингийн илүүдэл 5-10 хувьтай байсан бол ОХУ-д 10.9, Хятадад 17.5, Америкт 22.7, Науруд 36,3 хувь байна. Харин 10-19 настай хүүхдүүдийн дундах жингийн илүүдлээр Монгол улс харьцангуй бага буюу таваас доош хувьтай бүсэд багтжээ.

Эх сурвалж: www.cnn.com