Ойрын гурван жилдээ дахин тохиохгүй "Цусан сар" маргааш тэнгэрт үзэгдэнэ
Маргааш буюу 2026 оны 3-р сарын 3-ны мягмар гарагт одон орон судлалын ховор үзэгдэл болох "Цусан сар" буюу сарны бүтэн хиртэлт тохиох гэж байна. Энэ удаагийн тэнгэрийн үзэгдэл нь ирэх гурван жилийн хугацаанд дэлхий дахинаа дахин ажиглагдахгүй сүүлчийн бүтэн хиртэлт гэдгээрээ онцлог бөгөөд дараагийн тохиолдол нь 2028 оны сүүл хүртэл хүлээгдэж байгаа юм.
Энэхүү байгалийн өвөрмөц үзэгдлийг дэлхийн хүн амын 40 гаруй хувь буюу гурван тэрбум гаруй хүн үзэх боломжтой байна. Тухайлбал, Зүүн Азийн орнууд, Австрали, Шинэ Зеландад сар мандах үеэр болон шөнийн цагаар тод ажиглагдах бол Хойд Америкийн АНУ, Канадын бүх мужид үүрийн цагаар харагдах аж. Харин Номхон далайн бүс нутагт хиртэлт шөнийн турш бүрэн харагдах хамгийн таатай нөхцөл бүрдсэн байна. Харамсалтай нь Европ, Африк болон Ойрхи Дорнодын оршин суугчид энэ удаагийн хиртэлтийг харах боломжгүй юм.
Сар дэлхийн бүтэн сүүдэр буюу "umbra"-д орох үед нарны шууд гэрэл хаагддаг ч дэлхийн агаар мандлаар хугарсан нарны улаан туяа саран дээр тусдаг байна. Энэхүү физикийн үзэгдлийн улмаас сар зэс шиг улаан эсвэл гүн улаан өнгөтэй харагддаг тул олон улсад "Blood Moon" буюу "Цусан сар" хэмээн нэрлэж заншжээ. Одон орон судлаачдын тооцоолсноор сар дэлхийн сүүдэрт бүрэн орох буюу "totality" үе шат ойролцоогоор 58-59 минут үргэлжлэх бөгөөд олон улсын цагаар хиртэлтийн оргил үе 11:33 цагт тохиох аж.
Хэдийгээр 2026 оны 8-р сард сарны хэсэгчилсэн хиртэлт болох төлөвтэй байгаа ч энэ удаагийнх шиг бүтэн хиртэлт нь 2028 оны 12-р сарын 31-ний Шинэ жилийн баяр хүртэл дахин тохиохгүй юм. Ийнхүү одон орон сонирхогчид болон гэрэл зурагчид дараагийн "Улаан тэргэл сар"-ыг харахын тулд бараг гурван жил хүлээх шаардлагатай болж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.