🔴М.Бадамсүрэн: Жагсаалтын гишүүд ёс зүй, үг хэл, үйл хөдлөлөөрөө нийгэмд үлгэр жишээ үзүүлэх үүрэгтэй

МАН-ын Бага хурлын хоёрдугаар хуралдаанд УИХ-ын дарга, МАН-ын дарга Н.Учрал болон Ерөнхий сайд Г.Занданшатар нар илтгэл тавьж, хуралдаан цааш хаалттай үргэлжилж байна. 

УИХ-ын гишүүн, Хүнс, хөдөө аж ахуй, хөнгөн үйлдвэрийн сайд М.Бадамсүрэн:

-МАН-ын Хяналтын ерөнхий хороо нэр бүхий дөрвөн гишүүний асуудлыг хэлэлцэж, хариуцлага тооцох чиглэлээр ажиллаж байна. Намын удирдлагын зүгээс ёс зүйн алдаа гаргасан гишүүдэд хариуцлага тооцох нь ард түмний зүй ёсны шаардлага гэж үзэж байгаа юм. Орон нутгийн иргэдтэй уулзах үеэр ч төрийн өндөр албан тушаалтнууд дээрээсээ эхлэн хариуцлагатай байж, алдаа дутагдал гаргасан бол албан тушаалаас нь чөлөөлдөг тогтолцоог бүрдүүлэхийг иргэд хүсэж байна.

УИХ-ын гишүүнийг эргүүлэн татах тухай хуулийн төслийг Ерөнхийлөгчийн зүгээс санаачлан өргөн барьсныг гишүүд дэмжиж байна. Хууль тогтоогчид бүрэн эрхийнхээ ард нуугдах бус, хуулийн өмнө тэгш байж, шаардлагатай тохиолдолд шалгуулдаг, хариуцлага хүлээдэг байх ёстой. Ингэж байж ард иргэдэд шаардлага тавих ёс зүйн эрхтэй болно гэдгийг онцоллоо. УИХ-ын гишүүнээр сонгогдсон хэн боловч, тойргоос эсвэл жагсаалтаар сонгогдсон эсэхээс үл хамааран эргүүлэн татагддаг байх нь олон улсын жишиг төдийгүй Үндсэн хуулийн зарчим.

Сонгуулийн холимог тогтолцооны хүрээнд жагсаалтаар нэр дэвшигчдэд тавих шаардлагыг өндөрсгөх асуудал иргэдийн анхаарлын төвд байна. Иргэдийн зүгээс жагсаалтын ард олон нийтэд танигдаагүй хүмүүс орж ирэх вий гэсэн болгоомжлол байдаг. Харин тойргоос сонгогдсон гишүүд сонгогчидтойгоо амьд харилцаатай байж, тулгамдсан асуудлыг газар дээр нь сонсож ажилладаг давуу талтай. Тиймээс жагсаалтаар нэр дэвшигчид зөвхөн танхимд суух бус, ёс зүй, үг хэл, үйл хөдлөлөөрөө нийгэмд үлгэр жишээ үзүүлэх онцгой үүрэгтэй гэлээ.