🔴Ард нийтийн санал асуулга хөдөлгөөнөөс УИХ-ыг тараах асуудлаар санал асуулга явуулах, цуглаан зохион байгуулна

"Ард нийтийн санал асуулга" хөдөлгөөнөөс УИХ-д итгэл үзүүлэх эсэх асуудлаар бүх нийтийн санал асуулга явуулж, ирэх гуравдугаар сарын 1-ний өдөр Сүхбаатарын талбайд "Бид итгэхгүй байна" нэртэй цуглаан зохион байгуулахаар болсноо албан ёсоор мэдэгдлээ. Тус хөдөлгөөнийхөн цуглаан хийх тухай мэдэгдлээ Сүхбаатар дүүргийн Засаг даргын тамгын газарт хүргүүлсэн байна.

Зохион байгуулагчдын зүгээс уг цуглааныг "Үндсэн хуультай, Төрийн далбаатай цуглаан" хэмээн нэрлэж байгаа бөгөөд оролцогчдыг Монгол Улсын Үндсэн хууль болон Төрийн далбаагаа барин ирэхийг уриаллаа. Энэхүү арга хэмжээ нь Монголчууд Үндсэн хуулийн үзэл санаан дор нэгдэж, шударга ёс, эв нэгдлийн төлөө сонголтоо хийх түүхэн боломж гэдгийг тэд онцолж байна.

"Ард нийтийн санал асуулга" хөдөлгөөний зохицуулагчдын хэлж буйгаар, өнөөдрийн УИХ-д итгэл үзүүлэх боломжгүй олон үндэслэл бий. Тухайлбал, Үндсэн хуулийн цэцээс УИХ-ын зарим шийдвэрийг Үндсэн хууль зөрчсөн гэж дүгнэсэн, мөн ЖДҮ, 60 тэрбум, нүүрсний хулгай зэрэг их наядаар хэмжигдэх хохиролтой авлига, албан тушаалын гэмт хэргүүд шийдэгдэхгүй байгаа нь төрийн чадамж суларсныг илтгэж байна гэж үзэж байна.

Тус хөдөлгөөн нь нийгмийг үймээн самуунд бус, зөвхөн хуулийн хүрээнд, тайван замаар өөрчлөх байр суурьтай байгаагаа илэрхийлэв. Ард нийтийн санал асуулгын тухай хуулийн 4 дүгээр зүйлд заасны дагуу төрийн дотоод бодлогыг тодорхойлох асуудлаар иргэдийн саналыг шууд авах эрх зүйн үндэслэл байгааг тэд санууллаа.

Мөн маргааш буюу хоёрдугаар сарын 27-ны өдөр Сонгуулийн ерөнхий хорооны байранд улс төрийн намууд, иргэний нийгмийн байгууллагууд болон үйлдвэрчний эвлэлийн төлөөллүүдийг оролцуулсан хэлэлцүүлэг зохион байгуулахаар төлөвлөжээ. Уг хэлэлцүүлгээр Үндэсний аюулгүй байдал болон Ард нийтийн санал асуулга явуулах эрх зүйн гаргалгааны талаар нэгдсэн ойлголтод хүрэхийг зорьж байгаа юм.

"Ард нийтийн санал асуулга" хөдөлгөөн нь одоогоор 21 аймаг, 9 дүүргийн хэмжээнд салбар нэгжүүдээ байгуулж эхэлсэн бөгөөд гуравдугаар сарын 1-ний цуглааны дараа орон нутгуудаар явж, иргэдэд Үндсэн хууль болон бусад холбогдох хууль тогтоомжийн талаар сургалт, сурталчилгааны ажил хийхээр төлөвлөжээ. Тэд энэхүү үйл ажиллагааг эх орноо авлига, албан тушаалын гэмт хэргээс хамгаалах иргэний үүргээ биелүүлж буй хэлбэр хэмээн тодорхойлж байна.