БИЧЛЭГ: FBI-ийн захирал К.Пател олимпын ялалтыг тэмдэглэж буй бичлэг шуугиан тарилаа

2026 оны Миланы өвлийн олимпын наадмын үеэр АНУ-ын эрэгтэйчүүдийн хоккейн баг алтан медаль хүртсэний дараа Холбооны Мөрдөх Товчооны (FBI) захирал Каш Пател тамирчидтай хамт хувцас солих өрөөнд баяраа тэмдэглэж буй бичлэг олон нийтийн сүлжээнд тархаж, хүчтэй шүүмжлэл дагууллаа.

Италийн Милан хотод болсон шигшээ тоглолтод АНУ-ын баг Канадыг нэмэлт цагт буулган авсны дараа Пател тамирчдын хамт шар айраг ууж, ширээ нүдэн баярлаж буй дүр зураг камерын дуранд өртсөн байна.

Тус үйл явдал Милан хотын "Santagiulia" мөсөн ордонд болсон бөгөөд багийн тоглогч Дилан Ларкины Instagram хуудсанд нийтлэгдээд удалгүй устгагдсан бичлэгт Пател шар айраг цацаж, багийнхантай хамт дуулж байгаа нь үлджээ. Түүнчлэн довтлогч Мэттью Ткачук өөрийн дөнгөж хүртсэн алтан медалиа Пателын хүзүүнд зүүж өгч байгаа болон тэд хамтдаа Тоби Китийн "Courtesy of the Red, White and Blue" дууг дуулж байгаа нь олны анхаарлыг татав. Хэдийгээр бичлэгийг устгасан ч уг дүрс бичлэг "X" платформ дээр хэдийнэ тархаж амжсан байна.

Энэхүү үйлдэл нь хэд хэдэн ноцтой шалтгаанаар шүүмжлэлд өртөөд байна. Нэгдүгээрт, Пател Итали руу Хууль зүйн яамны тусгай зориулалтын "Gulfstream" онгоцоор ниссэн нь татвар төлөгчдийн мөнгийг хувийн зугаа цэнгэлд ашигласан гэх хардлагыг төрүүлэв. Хоёрдугаарт, түүнийг Миланд баярлаж байх үед АНУ-д Ерөнхийлөгч Дональд Трампын Мар-а-Лаго эдлэн газар руу зэвсэгт этгээд нэвтрэхийг завдсан ноцтой аюулгүй байдлын зөрчил гарч, нууц албаныхан хариу арга хэмжээ авч байсан нь нөхцөл байдлыг улам хурцатгажээ. Шүүмжлэгчид улс оронд нь аюулгүй байдлын ноцтой асуудал үүссэн үед тусгай албаны дарга ийм байдалтай байгаад дургүйцлээ илэрхийлсэн байна.

Шүүмжлэлийн хариуд FBI-ийн хэвлэлийн төлөөлөгч Бен Уильямсон уг айлчлалыг "албан ёсны ажил" хэмээн тайлбарлаж, Италийн хууль сахиулах байгууллагынхантай уулзах, олимпын аюулгүй байдлыг хангах зорилготой байсан гэж мэдэгдэв. Харин Каш Пател өөрийн цахим хуудсаараа дамжуулан "Найзуудынхаа урилгаар түүхэн мөчийг хуваалцсандаа баяртай байна" хэмээн үйлдлээ өмгөөлсөн байна. Энэхүү үйл явдал нь төрийн өндөр албан тушаалтны ёс зүй, төсвийн хөрөнгийн зарцуулалт болон үндэсний аюулгүй байдлын чухал мөчид удирдлагын гаргаж буй үйлдлийн талаарх олон нийтийн хэлэлцүүлгийг өрнүүлээд байна.