Корнеллийн их сургуулийн оюутан асан Э.Билгүүнд ял оноох шүүх хурал маргааш болно

АНУ-ын Нью-Йорк мужийн Томпкинс тойргийн шүүхэд Корнеллийн их сургуулийн оюутан асан Э.Билгүүнд холбогдох эрүүгийн хэргийн ял оноох сонсох ажиллагаа орон нутгийн цагаар 2 дугаар сарын 24-ний өдөр буюу маргааш болох гэж байна. Шүүгч Скотт А. Миллер даргалах тус хурлаар шүүгдэгчид оногдуулах хорих ялын хэмжээг эцсийн байдлаар шийдвэрлэх бөгөөд уг процесс нь хууль зүйн хувьд хэргийн шийдвэрлэлтийн хамгийн чухал үе шатуудын нэг юм.

Өнгөрсөн 2025 оны 11 дүгээр сарын 24-ний өдөр тангарагтны шүүх бүрэлдэхүүн хэргийг долоо хоногийн турш хэлэлцсэний эцэст түүнийг бүх зүйл ангиар гэм буруутай гэж үзсэн билээ. Шүүхээс түүнийг Нью-Йорк мужийн хуулиар "B" ангиллын хүнд гэмт хэрэгт тооцогдох нэгдүгээр зэргийн хүчин болон хүчирхийлэл үйлдэх зорилгоор бусдын эзэмшилд нэвтэрсэн хоёрдугаар зэргийн орон байрны хулгайн гэмт хэрэг үйлдсэн болохыг албан ёсоор тогтоосон байдаг.

Хэргийн нөхцөл байдлыг сөхөн үзвэл, 2024 оны 9 дүгээр сарын 1-ний өглөө их сургуулийн дотуур байрны өрөөнд зөвшөөрөлгүй нэвтэрч, биеэ хамгаалах чадваргүй буюу согтуурсан байдалтай байсан хохирогчийг хүчирхийлсэн хэрэг гарсан юм. Тухайн үед их сургуулийн цагдаагийн газраас шуурхай ажиллагаа явуулж, хэрэг гарснаас хойш арав хоногийн дараа буюу 9 дүгээр сарын 12-ны өдөр сэжигтнийг баривчилж байжээ.

Прокурорын газраас мэдээлснээр шүүгдэгчийн үйлдсэн хэргийн ноцтой байдлаас шалтгаалан нийт 25 хүртэлх жилийн хорих ял оноох магадлал өндөр байна. Тодруулбал, хүчингийн хэрэгт 5-аас 25 жил, орон байранд хууль бусаар нэвтэрсэн үйлдэлд 3.5-аас 15 жилийн ял төлөвлөгддөг аж. Түүнчлэн ял эдэлж дууссаны дараа АНУ-ын "Бэлгийн гэмт хэрэгтнүүдийн бүртгэл"-д насан туршдаа бүртгэгдэхээс гадна албадан гаргах процесс яригдах нөхцөл үүсээд байна.

Энэ удаагийн шүүх хурал нь шүүгдэгчийн гэм буруутай эсэхийг дэнслэх бус, харин түүний нийгмээс тусгаарлагдах хугацааг тогтоох шийдвэрлэх үе шат юм. Олон нийтийн анхаарлын төвд байгаа уг хэргийн эцсийн шийдвэр гарснаар хууль зүйн процесс албан ёсоор өндөрлөж, ял эдлэх үйл явц эхлэх болно.