"Эрдэнэс Тавантолгой" ХК 2025 оны цэвэр ашгаас ногдол ашиг тараахаар боллоо
“Эрдэнэс Тавантолгой” ХК-ийн ТУЗ-ийн хурлаар 2025 оны цэвэр ашгаас нийт хувьцаа эзэмшигчдэд ногдол ашиг тараах шийдвэрийг гаргажээ. "Эрдэнэс Тавантолгой" ХК 2025 онд 1.1 их наяд төгрөгийн цэвэр ашигтай ажилласан. Түүнээс 786.6 тэрбум төгрөгийг нийт хувьцаа эзэмшигчдэд, Монгол Улсын 3.5 сая хувьцаа эзэмшигч иргэдэд 208.5 тэрбум төгрөгийн ногдол ашиг олгохоор шийдвэрлэжээ.
Ингэхдээ 1072 хувьцаатай иргэнд татварын дараах дүнгээр 63,242 төгрөгийн ногдол ашгийг 2026 оны 04 дүгээр сарын 30-ны өдөрт багтаан олгохоор шийдвэрлэжээ.
Тус компанийн удирдлагуудын зүгээс татварын өндөр ачаалал болон дэд бүтцийн томоохон бүтээн байгуулалтын төслүүдийн санхүүжилтээс шалтгаалан ногдол ашиг тараах боломж хомс байж болзошгүй гэсэн мэдээлэл өмнө нь гарч байсан ч, аудитаар баталгаажсан санхүүгийн тайлан эерэг гарч, ашигт ажиллагаа хангалттай түвшинд хүрсэн тул ийнхүү шийдвэрлэсэн байна.
Өнгөрсөн нэгдүгээр сард компанийн гүйцэтгэх захирлын үүрэг гүйцэтгэгч Н.Цэрэнсамбуу 1.7 их наяд төгрөгийн татварын өр болон Гашуунсухайт-Ганцмод чиглэлийн хил дамнасан төмөр зам, дулааны цахилгаан станц зэрэг мега төслүүдийн санхүүжилтээс үүдэн санхүүгийн хүндрэл үүсч болзошгүйг мэдэгдэж байв. Гэсэн хэдий ч 2025 онд экспортын хэмжээ өндөр байж, өмнөх оны түүхэн амжилтаа хадгалж чадсанаар 1,072 хувьцаа эзэмшигч иргэдэд өгөөж хүртээх боломж бүрджээ.
Иргэд өөрсдийн эзэмшиж буй хувьцааны тоо ширхэг болон ногдол ашгийн мэдээллийг төрийн үйлчилгээний нэгдсэн цахим системүүд болон 158989 тусгай дугаараар дамжуулан шалгах боломжтой. Төрийн эзэмшлийн хувьцааны ногдол ашгийн тодорхой хэсэг нь иргэдийн эрүүл мэнд, боловсрол, орон сууцны асуудлыг шийдвэрлэхэд чиглэсэн Хуримтлалын санд төвлөрөх бөгөөд энэ нь байгалийн баялгийн өгөөжийг нийт ард түмэнд тэгш хүртээх бодлогын чухал хэсэг болж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.