Үхэр, бар, нохой, хонь жилтнүүдэд ивээлтэй сайн жил гарах төлөвтэй байна

XVII жарны “Сүрээр дарагч” хэмээх Гал морин жил гарч, хаврын тэргүүн сарын шинийн тавны өдөр тохиож байна. Шороон үхрийн зурлагаар шинжвэл энэ жил хүн зонд амгалан тайван, өвчин зовлонгүй, буян заяа дэлгэрсэн таатай жил байх төлөвтэй байгааг зурхайчид онцоллоо. Гэвч жилийн дунд хэсгээр байгаль цаг уурын хувьд бага зэрэг гандуу байх төлөв ажиглагдсан тул хөдөө аж ахуй, газар тариалангийн салбарынхан эртнээс бэлтгэлтэй байхыг сануулж байна.

Жилийн ерөнхий төлөв байдлыг нийгмийн амьдралтай холбон авч үзвэл төр засаг хууль цаазаа чангатгах хандлагатай боловч энэ нь ард иргэдэд ээлтэйгээр тусах нигууртай аж. Ялангуяа залуу үеийнхэнд маш ээлтэй, ажил үйлс нь бүтэмжтэй, санасан зорьсондоо хүрэхэд таатай жил байх бол настан буурлууд болон нялхас биеэ энхрийлж, эрүүл мэнддээ онцгой анхаарах шаардлагатай. Мөн энэ жил “Нэг цагаан мэнгэ” голлож буй тул иргэд халуун чанарын өвчнөөс урьдчилан сэргийлэх нь зүйтэйг зурхайн ухаанд тэмдэглэжээ.

Энэ онд 12 жилтнүүдийн төөрөг харилцан адилгүй байх бөгөөд Үхэр, Бар, Нохой, Хонь жилтнүүдэд ивээлтэй сайн жил гарах төлөвтэй байна. Тухайлбал, Үхэр жилтнүүдийг “Луугийн буян” од ивээж, санасан ажил нь сэтгэлчлэн бүтэх бол Бар жилтнүүдийн хийморь сэргэж, удирдан зохион байгуулах ажилд амжилт гаргана. Харин Хулгана жилтнүүдийн хувьд жил нь “Их харш” тул санхүүгийн эрсдэлтэй алхам хийхээс зайлсхийж, аливаа асуудалд хүлээцтэй хандахыг зөвлөж байна. Мөн Туулай жилтнүүд бичиг баримтын бүрдүүлэлтэд хянуур хандах хэрэгтэй.

Жил нь орж буй Морин жилтнүүд болон 33-ны мөчлөг нь тохиож буй 1994 оны Нохой жилтнүүд тусгайлан засал номоо хийлгэх шаардлагатайг Гандантэгчэнлин хийдийн зурхайчид зөвлөж байна. Түүнчлэн “Гал” суудал дээр суусан буюу 2026, 2018, 2010, 2002, 1994 онд төрсөн эрчүүд гал голомтоо ариусгаж, зүүн урд зүгт мөрөө гаргах зэрэг уламжлалт зан үйлийг гүйцэтгэх нь тухайн жилийн барцад саадыг арилгахад тустай гэж үздэг. 

Өрнийн зурхайгаар өнөөдөр гэр бүлийн харилцаа, дотоод амар амгаланг эрхэмлэх өдөр тул ирэх ажлын өдрүүдэд зориулан эрч хүчээ нөөцлөхийг одод зөвлөж байна.