Финландчууд АНУ-ын багаас хариугаа авлаа

Шайбтай хоккейн залуучуудын дэлхийн аварга шалгаруулах тэмцээний хагас шигшээд өрсөлдөх багууд тодорлоо. 

Шөвгийн наймын тоглолтууд үнэхээр халуухан болж өрнөлөө. Энэ удаагийн ДАШТ-ий хамгийн том дуулиан нь өмнөх жилийн аварга бөгөөд тэмцээнийг зохион байгуулагч АНУ-ын шигшээ баг шөвгийн наймд Финландад хожигдож, тэмцээнийг орхилоо. АНУ-ын баг тоглолтын төгсгөлд хаалгачаа гаргаж байгаад оноог тэнцүүлж чадсан ч нэмэлт цагт Финландын Артту Валила гоол оруулснаар талбайн эздийг үзэгчидтэй нь хамт "нам гүм" болголоо. Түрүү жилийн ДАШТ-ий алтан медалийн төлөөх тоглолтод дээрх багууд мөн нэмэлт цагт 4:3 харьцаагаар хожилцож байсан ба энэ удаа АНУ-ын баг бус Финландчуудын хожих ээлж иржээ.

Шөвгийн наймын бусад тоглолтын тухайд:

Канад 7 - Словак 1 : Канадын баг зөвхөн нэгдүгээр үед л таван гоол оруулж, тоглолтын хувь заяаг шийдсэн.

Швед 6 - Латви 3: Швед шөвгийн наймд 20 удаа дараалан ялалт байгуулсан түүхэн амжилтаа үргэлжлүүлэв.

Чех 6 - Швейцар 2: Швейцар эхлээд тэргүүлж байсан ч Чехүүд таван гоол дараалан оруулж эргэн ирэлт хийв. 

Хагас шигшээд Канад - Чех, Швед - Финланд гэсэн "гал гарсан" тулаанууд гарахаар болоод байна.