🔴Х.Ганхуяг: Зөвшөөрөл нь шийдвэр гаргагчдын хувьд хар тамхи шиг болчихсон

Монгол Улсын Шадар сайд Х.Ганхуяг:

-Ер нь зөвшөөрөл гэдэг шийдвэр гаргагч нарын хувьд хар тамхи шиг болчихсон. Хүнийг барьцаанд байлгаж, янз янзын юм нэхдэг. Муугаар хэлбэл, авлига, албан тушаалын асуудал, хүнд суртал, тодорхой ААН-үүдийн эрх ашиг, зах зээлийг нь хамгаалах гээд олон асуудал байдаг. Тиймээс анх Зөвшөөрлийн тухай хуулийг батлуулаад, зөвхөн үндэсний аюулгүй байдал, эрүүл мэнд, хүнсний аюулгүй байдал, төрийн нийтийн өмчийг ашиглахтай холбоотой 362 зөвшөөрлийг авч үлдсэн юм.

Өмнө нь 1600-1700 байснаас 362 болгосон ч хэрэгжилт дээр асуудал гарсан. Жишээлбэл, Зөвшөөрлийн тухай хууль дээр витамины импортыг хориглосон байхад салбарын эмийн хэрэгслийн хууль дээр "Зөвшөөрөлтэй" гээд үлдээчихсэн. Салбар бүрийн агентлаг, яам дээр мафийн сүлжээ шиг тогтолцоо үүссэн байна. Тийм учраас энэ удаагийн хуульд "Мэдэгдэл" гэдэг асуудлыг оруулж байгаа юм. Тусгай зөвшөөрлийн тоог бууруулаад, эрсдэл багатайг нь "Энгийн" рүү шилжүүлээд, мэдэгдлээр эрхэлж болох үйл ажиллагааг ялгаж өгсөн. "Би ийм үйл ажиллагааг эхлүүллээ" гээд эрх бүхий байгууллага руу мэдэгдэл хүргүүлэхэд л болно. Гэхдээ стандартын шаардлагыг хангуулна.

Энэ нэмэлт өөрчлөлт ер нь 3-4 жилийн хугацаанд байнга шинэчлэгдээд, мэдэгдлийн тоог нэмээд явах ёстой. Ингэж байж иргэд, ААН өөрсдөө сураад, хүнд сурталгүй үйл ажиллагаа эрхлэх боломжтой болно. Нэг талдаа хувийн хэвшилд эрх үүргийг нь ойлгуулж, нөгөө талдаа эрх мэдэлтнүүдийн гарын үсгээрээ хүнд суртлыг бий болгодог асуудлыг бууруулна гэлээ.