АМГТГ-ын даргын үүрэг гүйцэтгэгч асан Ш.Ганхуяг 2.7 тэрбумын хахуулиа үл хөдлөх хөрөнгө болгосон уу

Энэ талаар АТГ-ын Хэвлэл мэдээлэл, олон нийттэй харилцах ажилтан, комиссар Б.Билэгтээс тодруулахад “Олон-Овоот гоулд” ХХК-иас 148.5 тэрбум төгрөгийг гаргуулан “Зоос”, “Хадгаламж”, “Анод” банкны эрх хүлээн авагчид олгуулахаар шийдвэрлэсэн 18 гүйцэтгэх хуудсын дагуу шүүхийн шийдвэр гүйцэтгэх байгууллага 2012 оноос хойш ажиллагаа явуулж, барьцаа хөрөнгө болох Өмнөговь аймгийн Мандал-Овоо сумын нутаг дахь ашигт малтмалын найман тусгай зөвшөөрлийг Монголбанкнаас томилогдсон Банкны эрх хүлээн авагчид шилжүүлжээ. Гэвч АМГТГ-ын удирдах албан тушаалтнаар ажиллаж байсан нэр бүхий хүн нь энэхүү тусгай зөвшөөрлийг 2025 оны тавдугаар сарын 06-нд “Олон-Овоот гоулд” болон “Зөв зүг” ХХК-ийн эзэмшилд хууль бусаар шилжүүлж, үүнийхээ хариуд 2.7 тэрбум төгрөг бусдаар дамжуулан хахуульд авсан, албан тушаалын байдлаа урвуулан 148.5 тэрбум төгрөгийн хохирол учруулсан үйлдлийг АТГ-ынхан илрүүлэн шалгаж байгаа юм.

Уг хэрэгт гурван хүнийг холбогдуулан Эрүүгийн хуулийн 22.4-2-ын хахууль авах, 22.5-1-ийн хахууль өгөх гэсэн заалтын дагуу яллагдагчаар татаж, цагдан хорих таслан сэргийлэх арга хэмжээ авсан. Нэг хүнийг баривчилж, мөрдөн шалгах ажиллагааг үргэлжлүүлэн явуулж байна. Түүнчлэн төрд учирсан 148.5 тэрбум төгрөгийн хохирлыг нөхөн төлүүлэх арга хэмжээг нэн тэргүүнд авч эхэлсэн” хэмээсэн юм.

“Жаст”-ын Ш.Батхүүгийн нэр дээр байсан тусгай зөвшөөрлүүдийг “Алтжин”-гийн гэх нэрээр нь монголчууд мэддэг Г.Алтан агсан худалдан авснаар “Олон-Овоот гоулд” ХХК түүний хамаарал бүхий хүмүүсийн нэр дээр шилжсэн байдаг. Үүнээс өмнө Ш.Батхүү нар “Олон-Овоот гоулд”-ын тусгай зөвшөөрлүүдийг “Зоос”, “Анод”, “Хадгаламж” банканд барьцаалан 140 гаруй тэрбум төгрөгийн зээл авсан ч буцаан төлөөгүй юм. Ингэснээр төрд буюу Монголбанк, Сангийн яаманд дээрх 148.5 тэрбум төгрөгийн хохирол учирсан аж.

Ш.Батхүү, Г.Алтан, Э.Сүрэн зэрэг хүнд холбогдох хэргийг шүүх эцэслэн шийдвэрлэхдээ алтны уурхайн дээрх тусгай зөвшөөрлүүдийг Монголбанкны харьяанд байгуулсан охин компани болох “Минерал эксплорэйшн фандинг” ХХК-д шилжүүлэхийг даалгасан. Уг шийдвэрийн дагуу АМГТГ-ын Кадастрын хэлтсийн даргын тушаалаар “Олон-Овоот гоулд”, “Зөв зүг” ХХК-ийн эзэмшилд байсан тусгай зөвшөөрлүүдийг “Минерал эксплорэйшн фандинг”-д 2024 оны намар шилжүүлээд байж. Гэтэл АМГТГ-ын даргын албан үүргийг түр орлон гүйцэтгэгчээр ажиллаж байхдаа Ш.Ганхуяг өнгөрсөн тавдугаар сард уг тушаалыг хүчингүй болгож, буцаан олгохоор шийдвэрлэсэн гэнэ. Үүнийхээ хариуд 2.7 тэрбум төгрөгийн хахууль авсан бөгөөд уг мөнгөө Чингэлтэй дүүргийн IV хорооны нутагт барьж буй объектод хөрөнгө оруулалт нэрээр шилжүүлж, угаасан хэрэгт буруутгагдаж байгаа юм.