🔴Б.Жавхлан: Намын даргад нэр дэвшсэн Н.Учралыг тууштай дэмжинэ

МАН-ын ээлжит 31 дүгээр их хурал үргэлжилж байна. Хурлын төлөөлөгч, УИХ-ын гишүүн, Сангийн сайд Б.Жавхлангаас цаг үеийн асуудлаар тодруулга авлаа. 

Тэрбээр, энэ удаагийн намын их хурал цаг хугацааны хувьд өндөр ач холбогдолтой болж байгааг онцолсон. Дэлхий дахинд геополитикийн томоохон өөрчлөлтүүд гарч, дараагийн 30-40 жилийн цаг үеийг тодорхойлох хөдөлгөөнүүд бий болж байгаа энэ үед дотоод эдийн засагт ч ковидоос хойш цоо шинэ мөчлөг эхэлж байгаа нь хариуцлагатай түүхэн хурлыг тодорхойлж байна гэж үзэж байна гэв.

Сангийн сайд Б.Жавхлан, журмын нөхөр, Засгийн газрын гишүүн, Тэргүүн шадар сайд, Эдийн засгийн хөгжлийн сайд Н.Учралыг намын бодлогоор нэр дэвшиж байгаа тул тууштай дэмжинэ гэдгээ илэрхийллээ. Тэрээр 2027-2028 онд намын өмнө тулгарах томоохон сорилтууд, дунд хугацааны зорилтуудыг хамтран хэрэгжүүлэхэд дэмжиж ажиллахаа мэдэгдэв.

Мөн Б.Лхагважав нэр дэвшигчид талархалтай хандаж байгаагаа илэрхийлж, намын ардчилсан зарчмыг харуулсанд талархал илэрхийлэв. 

Шинэ намын даргаас хүсэж буй бодлогын хүрээнд төрийн залгамж чанарыг хадгалж, Засгийн газрын 4 жилийн хөтөлбөр, 5 жилийн төлөвлөгөөг уламжлан хэрэгжүүлэхэд анхаарч, зорилгодоо хүрэх шийдлүүдийг тодорхойлох нь чухал гэдгийг онцолсон.