🔴Дөрөв болон түүнээс дээш хүүхэдтэй өрхөд ипотекийн зээлийг дараалалгүй олгоно

Монгол Улсын Засгийн газар 2026-2030 оны хөгжлийн бодлогын үндсэн чиглэлийг УИХ-д өргөн барьжээ. "Шинэ итгэл, эрс шинэтгэл" уриан дор боловсруулсан ирэх таван жилийн үндсэн чиглэлээ Ерөнхий сайд Г.Занданшатар болон Засгийн газрын бүх гишүүн танилцуулж, сэтгүүлчдийн асуултад хариуллаа.

Тус бодлого нь "Алсын хараа-2050"-тай уялдуулсан найман зорилтот хөтөлбөр, хэмжигдэхүйц индикатортай. Тухайлбал, Дэлхийн банкны засаглалын үзүүлэлтээр авлигын индексийг 138-аас 120 дугаарт оруулах, ядуурлыг 15 хувиар бууруулах зорилт тавьсан. Засгийн газрын дөрвөн жилийн үйл ажиллагааны хөтөлбөрийг намын мөрийн хөтөлбөрт тулгуурлаж, улсын төсөв жил бүр энэ дагуу батлагдана.

Эдийн засгийн эрх чөлөөний хууль, хөрөнгө оруулалт, зөвшөөрлийн хуулиудыг өргөн барьжээ. Төрийн өмчийн компаниудыг ил тод болгох, хувьчлах бодлого хэрэгжүүлж, "Эрдэнэт үйлдвэр", Төрийн банк, цахилгаан түгээх компаниудыг 10-50 хувиар хувьчлах санал УИХ-д өргөн баригдана.

2010-2025 онд "Эрдэнэс Тавантолгой" компанийн 586 гэрээнээс 581-ийг ил тод болгосон. 

Уул уурхайн салбарыг тогтвортой хөгжүүлэхэд тулгуурлаж, экспортын 94 хувь, гадаад хөрөнгө оруулалтын 74 хувийг энэ салбар хариуцна. Эрсдэлийг бууруулахын тулд төрөлжүүлэх, ил тод байдлыг хангах, орон нутгийн хуваарилалтыг шударга болгох Ашигт малтмалын тухай хуулийн өөрчлөлтийг оруулжээ. 

Ядуурлыг 2030 он гэхэд 15 хувиар бууруулж, 413 мянган хүнийг ядуурлаас гаргах зорилготой. Авлигын индексийг сайжруулах ажлын хэсэг байгуулж, хаалттай гэрээнүүдийг ил тод болгоно. Цахим үйлчилгээг 90 хувьд хүргэх, төрийн худалдан авалтыг цахимжуулж, зардлыг 4-7 хувиар бууруулах төлөвлөгөөг мөн танилцуулсан юм. Ипотекийн зээлд 10.8 их наяд төгрөг олгосон, 35 мянган хүсэлт хүлээгдэж байгаа тул орон сууцны эх үүсвэрийг шийдвэрлэх ажлын хэсэг ажиллаж байна.

Хувийн хэвшлийг дэмжихэд татварын шинэчлэл хийж, 3-4 их наяд төгрөгийн ачааллыг бууруулна. Залуу малчдыг дэмжих, МАА-н үйлдвэрлэлийг 50 хувиар нэмэгдүүлэх бодлого хэрэгжүүлнэ. Соёлын өвийг ЮНЕСКО-д бүртгүүлэх, Чингис хааны музейг сурталчлах, аялал жуулчлалыг хөгжүүлэхээр төлөвлөжээ. ЭМД-ын сангийн зөрчлийг шалгаж, хууль хяналтад шилжүүлсэн бөгөөд цаашид ил тод, бие даасан тогтолцоог бий болгоно.

2030 он гэхэд эрчим хүчний хараат бус байдлыг хангаж, 15.9 их наяд төгрөгийн төсөвтэй төслүүд хэрэгжүүлнэ.

Төмөр замын 2500 км шинэ шугам тавих, дөрвөн боомтыг холбох төлөвлөгөөг зарласан юм. Таван жилийн чиглэлийг хэрэгжүүлэхэд 188 төсөл, 6 их наяд төгрөгийн санхүүжилт шаардлагатай бөгөөд үлдэгдлийг ТӨҮТ, зээлээр шийдэх аж. Ингээд эцэст нь, Засгийн газар хэвлэлтэй нээлттэй хамтран ажиллахыг онцолсон юм.