🔴Т.Аубакир: Багшийн цалинг 2026 онд 76 хувиар нэмж, 2.8 саяд хүргэхээр тохирсон

Багш нарын цалинг нэмэх хэлэлцээрийн талаар Гэр бүл, хөдөлмөр, нийгмийн хамгааллын сайд Т.Аубакир мэдээлэл өглөө.

УИХ-ын гишүүн, ГБХНХ-ын сайд Т.Аубакир:

-Өнгөрсөн баасан гарагт Боловсролын яам болон багш нарын үйлдвэрчний эвлэлийн хооронд хэлэлцээр хийгдсэн. Энэхүү хэлэлцээрийн дараах процесст Гэр бүл, хөдөлмөр, нийгмийн хамгааллын яам бүртгэх үүрэг гүйцэтгэх бөгөөд хэлэлцээ одоо хүчин төгөлдөр болсон гэж үзэж байна. Хэлэлцээрийн баримт бичгийг өнгөрсөн баасан гаргийн 18:00 цагийн үед манай яаманд хүргүүлсэн. Өнөө өглөө 08:30-аас эхлэн Төсвийн байнгын хороо, Сангийн яамны төлөөллүүд төсвийн боломжуудыг нарийвчлан хэлэлцэж байна.

Одоо МАН-ын бүлэг хуралдаж байгаа. 2026 онд багш нарын цалинг 76 хувиар нэмэхээр төлөвлөж байгаа бөгөөд 11 дүгээр сарын 1-нээс 2.8 сая төгрөгт хүргэнэ. 2027 онд 3.5 сая төгрөг болгоно гэсэн хэлэлцээрийн төсөл байна. Ерөнхийдөө нааштай шийдвэр гарах болов уу. Гэхдээ 76 хувийн нэмэгдэл бодитой эсэхийг бүх зүйлээс хасаж тооцоолох шаардлагатай. Өмнө нь урсгал зардлаас 15-20 хувиар хасаж байсан бол одоо төсвийн хөрөнгө оруулалт, үргэлжилж буй төслүүдээс хасна. Жишээлбэл, сум, аймгууд руу тавигдаж буй засмал замуудын ажлаас 15-20 хувиар хасаж, багш нарын цалинг нэмэх болно.

Хэрэв бүлэг шийдвэр гаргавал хэлэлцээрийг бүртгэж, багш нарын цалин нэмэгдэх болно. Бид багш нарын цалинг нэмэхийг хүсэхгүй байгаа биш. Хөгжлийн хэмжээ, төсөвтөө тохируулан зохицуулж байгаа гэв.