“Алтанжолоо импекс”-ийн В.Энхбаатарыг албан тушаалтанд хахууль өгсөн хэмээн шүүхэд шилжүүллээ
Хот байгуулалт, барилга, орон сууцжуулалтын яам (ХББОСЯ)-ны газрын даргаар ажиллаж байсан Д.Гантулга нарт холбогдох хэрэгт НПГ-аас дахин яллах дүгнэлт үйлдэж, Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхэд хоёр дахь удаагаа шилжүүллээ. Уг хэргийг өнгөрсөн зун шүүхийн урьдчилсан хэлэлцүүлгээс нэмэлт ажиллагаа хийлгэхээр прокурорт буцаасан юм.
Ингэхдээ “Алтанжолоо импэкс” ХХК-ийн захирал В.Энхбаатар Сүхбаатар дүүргийн нутаг циркийн хажууд барьсан “Алтанжолоо тауэр”-ийг Улсын комисст хүлээлгэн өгснийхөө үдэш нь Д.Гантулгад хоёр сая төгрөг өгсөн нь шалгалтаар тогтоогдсон. Гэтэл В.Энхбаатарыг шүүхэд яллагдагчаар татаж ирүүлээгүй. Мөн Д.Гантулгын гэр, албан тасалгаанаас хураасан их хэмжээний мөнгөний эх үүсвэрийг тогтоох ёстой гэж дүгнэсэн юм. Үүний дагуу холбогдох ажиллагааг хийгээд “Алтанжолоо импэкс” ХХК-ийн захирал, Худалдааны гавьяат ажилтан В.Энхбаатарыг Эрүүгийн хуулийн 22.5-1 дэх хэсэгт заасан нийтийн албан тушаалтанд албаны чиг үүрэгтэй нь холбогдуулж хахууль өгсөн гэх үндэслэлээр яллагдагчаар татсан байна.
ХББОСЯ-ны Барилга, барилгын материалын бодлого зохицуулалтын газрын даргаар ажиллаж байсан Д.Гантулга албан тушаалаа урвуулан ашиглаж, барилгын компаниудаас хахууль авсан хэрэгт холбогдсон. Тухайлбал, “Орчлонконсалтинг”, “Орчлонконстракшн” ХХК-д давуу байдал бий болгож, онцгой төвөгшилтэй барилгын тусгай зөвшөөрөл олгуулахын тулд Барилгын хөгжлийн төвийн албан тушаалтанд нөлөөлж, гаргуулан өгсний хариуд захирал Д.Ганзоригоос 20 сая төгрөгийн хахууль авсан. Мөн “Глобал бридж констракшн” ХХК-ийн “Глобал таун” хотхоны D хэсгийг Улсын комисст хүлээн авсан шийдвэрийг баталгаажуулж гарын үсэг зурсны хариуд эцсийн өмчлөгч Д.Баянзулаас 6.6 сая төгрөгтэй тэнцэх валют хахуульд авсан хэрэгт холбогдсон юм. НПГ-аас ХББОСЯ-ны газрын дарга асан Д.Гантулгад Эрүүгийн хуулийн 22.4-1 дэх хэсгийн нийтийн албан тушаалтан хахууль өгөгчийн ашиг сонирхлын үүднээс албаны чиг үүргээ хэрэгжүүлсний хариуд хахууль авсан хэмээн яллах дүгнэлт үйлдсэн аж. Харин “Орчлонконсалтинг” ХХК-ийн захирал Д.Ганзориг, “Глобал бридж констракшн” ХХК-ийн захирал Д.Баянзул нарт В.Энхбаатартай адил “Өөртөө давуу байдал бий болгох зорилгоор бусдад албаны чиг үүрэг, бүрэн эрх, албан тушаалын байдалтай нь холбогдуулан мөнгө, эд зүйл өгсөн” гэх заалтыг үндэслэн яллах дүгнэлт үйлдэн шүүхэд шилжүүлжээ.
Сурталчилгаа
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.