УИХ-ын дарга асан Д.Амарбаясгаланг гурван зүйл ангиар яллагдагчаар татжээ

УИХ-ын дарга асан Д.Амарбаясгаланг яллагдагчаар татан шалгаж байгаа талаар прокурорын байгууллагаас мэдээлэл өгчээ.

Тодруулбал, АТГ-ын Мөрдөн шалгах хэлтсээс УИХ-ын гишүүн Д.Амарбаясгаланд холбогдуулан улс төрд нөлөө бүхий этгээд эрх мэдэл, албан тушаалаа урвуулан ашиглах, их хэмжээний хахууль авах, мөн улс төрд нөлөө бүхий этгээд үндэслэлгүйгээр хөрөнгөжих зэрэг гэмт хэргүүдэд тус тус эрүүгийн хэрэг үүсгэж, яллагдагчаар татах санал ирүүлсэн байна. Прокуророос хэргийг хянаад, мөрдөгчөөс гаргасан санал үндэслэлтэй гэж үзэн, Д.Амарбаясгаланд холбогдуулан Эрүүгийн хуулийн тусгай ангийн дээрх гурван зүйл ангиар өнгөрсөн долоо хоногт яллагдагчаар татан, мөрдөн шалгах байгууллагад хүргүүлжээ.

Одоогоор мөрдөн шалгах ажиллагаа явагдаж байна. Хэрэг хэзээ шийдвэрлэгдэх талаар нарийн тогтоосон хугацаа байхгүй бөгөөд мөрдөн шалгах ажиллагааны явцын талаар дэлгэрэнгүй мэдээлэл өгөх боломжгүй гэж прокурорын байгууллагаас тэмдэглэсэн юм.