🔴УИХ-ын гишүүн Д.Энхтуяа: Ахмадуудын тэтгэврийг 1 сая 500 мянга болгох боломжтой гэж үзэж байгаа

"280 тэрбум төгрөгийг арилжааны банкуудад хүүгийн татаас, хүүгийн дэмжлэг гэж өгдөг. Үүнийгээ ахмад настны тэтгэвэр нэмэгдүүлэхэд өгөх шаардлагатай. Ахмад настанд үзүүлж байгаа халамжийн 10 хүрэхгүй хувийг ахмадын тэтгэвэр, тэтгэмж болон хөдөлмөр эрхлэлтэд зарцуулна гэсэн хуультай. Энэ хуулийг биелүүлж ажиллахыг шаардана" гэж УИХ-ын гишүүн Д.Энхтуяа хэлж байна. 

УИХ-ын гишүүн Д.Энхтуяа:

-Хөнгөлөлт дээр арилжааны банкуудад 280 тэрбум төгрөг тусгагдсан байгаа. Яагаад 280 тэрбум төгрөгийг хүүгийн татаас, хүүгийн дэмжлэг гэж өгдөг юм бэ? Түүний оронд ахмад настны дэмжлэгт анхаарч үзэх ёстой гэж бодож байна. Төсвийн хэлэлцүүлгийн явцад үүнийг өөрчлөх боломжтой гэж үзэж байна. Манай Монгол Улсын нийт хүн амын 10 хувь нь ахмад настан байна. Харин 2030 онд 11 хувь нь ахмад настан болно. Нийт хүн амын 12 хувь нь ахмад настан болбол хөгширч байгаа үндэстэн гэж олон улсад нэрлэдэг.

Өнөөдөр ахмадууд маань төрөөс сэтгэл гуйсан байдлаар яваад байна. "Тэтгэвэр нэмэгдүүлье" гэж байгаа ч бүх ахмадын тэтгэвэр тэгж хүссэн хэмжээгээр нэмэгдэхгүй. Ялгаатай шатлалтай нэмэгдэх учраас ахмадууд маань бухимдаад байгаа юм. Ахмад настанд үзүүлж байгаа халамжийн 10 хүрэхгүй хувийг ахмадын тэтгэвэр, тэтгэмж болон хөдөлмөр эрхлэлтэд зарцуулна гэсэн хуультай. Энэ хуулийг биелүүлж ажиллахыг шаардана гэв.