"Энергосервис монтаж" ХХК-ийнхнаас хахууль авсан байж болзошгүй хэмээн албан тушаалтнуудыг шалгаж байна
Эрчим хүчний яам (ЭХЯ)-нд өнөөдөр ЭЦА-наас нэгжлэг хийж, Дулааны хэлтсийн дарга С.Цэрэнжамцыг шалгаж эхэллээ. Бидний авсан мэдээллээр түүнийг цахилгаан станцын барилга байгууламжийг хүлээн авах Улсын комисст ажиллахдаа бусдад давуу байдал олгож, их хэмжээний хахууль авсан байж болзошгүй хэрэгт буруутгаж байгаа гэнэ.
Өмнөговь аймгийн Ханбогд сумын нутагт "Энергосервис монтаж" ХХК 30-аад тэрбум төгрөгийн өртгөөр Дулааны цахилгаан станц барих тендерт шалгарч, улмаар ажлаа бүрэн гүйцэд хийгээгүй ч Улсын комисст хүлээлгэж өгөхөөр ажиллуулсан юм байна. Энэ үедээ тус компанийнхан ЭХЯ-ны дээрх газрын дарга, "ДЦС-3" ТӨХК-ийн инженер, "ДЦС-4" ТӨХК-ийн хяналтын инженер В.Ганзориг, Өмнөговь аймгийн ИТХ-ын төлөөлөгч, тус аймгийн МАН-ын гишүүн, Ц.Сайхандэлгэр зэрэг албан тушаалтнуудад хахууль өгсөн хэрэгт холбогджээ. ЭЦА-ныхан энэ хэргийг шалгах ажлын хүрээнд С.Цэрэнжамц, Ц.Сайхандэлгэр, В.Ганзориг зэрэг хүмүүсийн гэр, албан тасалгаа зэрэгт прокурорын хяналт дор нэгжлэг хийж эд мөрийн баримтууд хураан авсан гэнэ.
Эх сурвалжуудын мэдээлж буйгаар хэрэгт холбогдогчдын нэг нь "Энергосервис монтаж" ХХК-ийнхнаас авсан хахуулийн мөнгөөрөө "Лексус-600" загварын автомашин авсныг битүүмжлээд буй аж. Эл хэрэгтэй холбоотойгоор "Энергосервис монтаж" ХХК-ийг үүсгэн байгуулагч, ерөнхий захирал Ц.Тогтохбаатар, гүйцэтгэх захирал Т.Пүрэвдорж нарын гэр, албан өрөөнд нь нэгжлэг хийсэн байна. Энэ талаар холбогдох албаныхнаас тодруулахад "ЭЦА-ныхан энэ хэргийг илрүүлэн шалгаж байна. Авлига, албан тушаалын хэрэг учраас прокурор АТГ-т шилжүүлэн шалгуулах шийдвэр гаргах байх" гэсэн юм.
Сурталчилгаа
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.