Академич Ж.Амарсанаагийн хүү, Тайландад суух Элчин сайд А.Төмөрийн гэргий Л.Орхон Бангкок хотод нас барсан харамсалтай хэрэг энэ сарын 9-нд гарсан.

Тус хэрэгт талийгаачийн нөхөр А.Төмөр холбоотой бөгөөд гэр бүлээс гадуур харилцаатай байсан гэх мэдээллийг төрөл төрөгсдийн зүгээс олон нийтийн цахимд нийтлээд байгаа юм. Тэгвэл тус хэрэгтэй холбоотойгоор Элчин сайд А.Төмөрийн аав, академич, Гавьяат хуульч Ж.Амарсанаа мэдээлэл өгчээ.

Элчин сайд А.Төмөрийн аав, академич Ж.Амарсанаа:

-Бидэнд тохиолдсон уй гашууг хуваалцаж байгаа та бүхэнд талархал илэрхийлж байна.

Манай бэр миний охиноос ялгаагүй. Миний бэр, хүүгийн минь эхнэр, гурван ачийн минь ээж тэнгэрт халилаа. Золгүй явдал тохиолдсон гэдгийг хэлмээр байна. Тайландын хууль шүүхийн байгууллага хянаж шалгаж байгаа гэж ойлгосон. Үүний дараа албан ёсны хууль зүйн шийдвэрүүд гарах байх гэж бодож байна.

49 хоног нь ч болоогүй байхад элдэв мэдэгдэл хийж, хүмүүсийн толгойг эргүүлэх хэрэггүй. Гэхдээ зайлшгүй шаардлага гарч ирсэн учраас ингэж ярьж байна. Олон нийтийн мэдээллийн хэрэгслээр янз бүрийн мэдээлэл гарч байна. Албан ёсны шийдвэр гараагүй байхад нийгмийг бужигнуулсан мэдээлэл түгээж байна. Бэр, хүү, ач нарын минь зургийг тавьж байгаад үнэхээр харамсаж байна. Хүлээцтэй, хүн чанартай байхыг хүсэж байна гэв. 

---