Олон улсын тээврийн төлөвлөлт, загварчлалын тэргүүлэгч PTV группийн Ази, Номхон далайн бүс хариуцсан төлөөлөгчдийг нийслэлийн Автозамын түгжрэлийг бууруулах төсөл, хөтөлбөрийн зохицуулагч Д.Бадарсан, Улаанбаатар хотын Ерөнхий архитектор Ч.Төгсдэлгэр, нийслэлийн Бодлого, төлөвлөлтийн газрын дарга П.Хадбаатар тэргүүтэй албаны хүмүүс хүлээн авч уулзжээ.

Уулзалтын үеэр авто зам, нийтийн тээвэр, хот төлөвлөлтийг хэрхэн уялдуулах болон холбогдох программ хангамжийн асуудлыг хэлэлцлээ. Улаанбаатар хотын зүгээс нийслэл хотын төлөвлөлтийг илүү чанаржуулж, тээврийн загварчлалыг олон улсын түвшинд хүргэхийг зорьж буй бөгөөд дэлхийн томоохон хотуудын туршлагаас санал солилцжээ.

Тухайлбал, PTV Visum программ нь хотын тээврийн бодит нөхцөл байдалд дүгнэлт хийж, тээврийн хэтийн эрэлт хэрэгцээг тодорхойлж, олон хувилбарт төлөвлөлтийн загварчлал гаргадаг тээвэр төлөвлөлтийн дэлхийн тэргүүлэгч программ хангамж гэдгийг PTV группийн Ази, Номхон далайн бүсийн гүйцэтгэх захирал Райан Вонг онцоллоо. Тээврийн математик загварчлал нь хот төлөвлөлтийн үйл ажиллагааны салшгүй хэсэг бөгөөд тээврийн бодлого боловсруулахад тооцоо судалгаан дээр үндэслэгдсэн тоон мэдээллийг хангаж өгдөг ач холбогдолтой аж.

---