П.Сайнзориг: Төрийн хэмнэлтийн хууль зөрчиж, ТӨҮГ-уудад бүтээмжийн менежер, хяналтын менежерүүдийг томилсон байна

Төрийн хэмнэлтийн тухай хуулийг зөрчиж, төрийн алба данхайх, төсвийн үр ашиггүй зардал нэмэгдэх байдал бий болсон гэж үзэж, УИХ-ын гишүүн П.Сайнзориг, Б.Энхбаяр, З.Мэндсайхан нар Монгол Улсын Ерөнхий сайд Л.Оюун-Эрдэнэд хандаж, өнөөдөр асуулт тавьсан байна. 

Энэ талаар УИХ-ын гишүүн П.Сайнзориг: 

-Хуулиар чиг үүргийг нь тодорхойлоогүй, Засгийн газрын гишүүн, яам, агентлагийн чиг үүрэгтэй давхардсан зөвлөл, төв, хороо, комисс зэрэг нэршилтэй байгууллагуудыг байгуулах замаар төрийн алба данхайх, төсвийн үр ашиггүй зардал нэмэгдэх байдал нэмэгдэж байна. Төрийн өмчит компани, банк, улсын үйлдвэрийн газарт “бүтээмжийн менежер”, “хяналтын менежер” гэх нэршил бүхий дэд, орлогч дарга /захирал/-ын статустай албан тушаалыг бий болгож, томилон ажиллуулж байгаа нь Төрийн хэмнэлтийн тухай нийцэж байгаа эсэх талаар иргэд, олон нийт шүүмжлэлтэй хандаж байна. Иймд уг асуудлаар УИХ-ын гишүүн Б.Энхбаяр, З.Мэндсайхан нарын хамтаар хуульд заасан бүрэн эрхийн хүрээнд асуулт тавилаа гэжээ.