?Б.Баярбаатар: Д.Цогтбаатар гишүүний асуудлыг УИХ-аар хэлэлцвэл Үндсэн хууль зөрчих эрсдэлтэй байна

УИХ-ын гишүүн Д.Цогтбаатарыг эгүүлэн татах нөхцөл бүрдсэн. Уг асуудлаар УИХ-ын Ёс зүй, дэгийн байнгын хорооны дарга Б.Баярбаатараас тодруулахад дараах байр суурийг илэрхийлэв. 

УИХ-ын Ёс зүй, дэгийн байнгын хорооны дарга Б.Баярбаатар:

-Шүүх засаглал хараат бус зарчмаар ажилладаг. Д.Цогтбаатар гишүүний асуудлыг УИХ-аар хэлэлцвэл Үндсэн хууль зөрчих эрсдэлтэй байна. Шүүхийн гаргасан шийдвэрийг УИХ-аар хэлэлцэх нь буруу. УИХ-ын гишүүн Д.Цогтбаатар шүүхийн шийтгэл ноогдсон иргэн. УИХ-д шүүхийн шийдвэрийг ямар хэлбэрээр яаж зохицуулах эрх зүйн зохицуулалт байхгүй.

Үндсэн хуулийн 29 дүгээр зүйл дээр “УИХ-ын гишүүн нь гэмт хэрэг үйлдсэн нь шүүхээр тогтоогдсон бол эргүүлэн татна” гэж заасан. УИХ-ын тухай хуулийн 9.1-5 дахь хэсгийн “Гишүүн гэмт хэрэг үйлдсэн болох нь хуулийн хүчин төгөлдөр болсон шүүхийн шийдвэрээр тогтоогдсон бол Төрийн байгуулалтын байнгын хорооны дүгнэлтийг үндэслэн УИХ тогтоол батална” гэж заасан.

Тэгэхээр Үндсэн хуулийн 29 дүгээр зүйл, УИХ-ын тухай хуулийн 9.1-5 дахь хэсгийн заалтууд хоорондын зөрчилтэй гэж үзсэн. УИХ-ын тухай хуулийн 9.1-5 дахь хэсгийг барьж уг асуудлыг хэлэлцэх нь Үндсэн хуулийг зөрчих эрсдэлтэй.

УИХ-ын гишүүн өөрөө өргөдлөө өгвөл хэлэлцэх боломжтой.

Намрын чуулганы хуралдааныг хамгийн их тасалсан Х.Баттулга гишүүнд ёс зүйн хариуцлага тооцно. С.Лүндэг гишүүний хувьд хариуцлага тооцох хэмжээнд таслаагүй байна.