Сэлэнгээс чөлөөлсөн Ж.Энх-Одыг Баянголын цагдаагийн дэд даргаар тавьжээ

Сэлэнгэ аймгийн Цагдаагийн газрын дөрвөн алба хаагч 13 настай охиныг эрхшээлдээ байлгаж, бүтэн нэг жилийн хугацаанд хүчирхийлсэн байж болзошгүй хэрэг гараад буй. 

Эл хэргийг үйлдсэн гэх алба хаагч Э-г шүүхийн шийдвэрийн дагуу цагдан хорьсон бол өчигдөр үлдсэн гурван албан хаагчийг 48 цагийн хугацаанд саатуулж, таслан сэргийлэх цагдан хорих арга хэмжээ авах хүсэлтийг АТГ-аас орон нутгийн прокурорт өгчээ. Уг хэргийг АТГ үргэлжлүүлэн шалгаж байна.

ЦЕГ-ын дарга, хурандаа Т.Сүхболд өнгөрсөн долоо хоногт Сэлэнгэ аймагт ажиллан тус аймгийн Цагдаагийн газрын үйл ажиллагааг шалгаж, удирдлагад нь хариуцлага тооцохоор очсон. Улмаар Сэлэнгэ аймгийн Цагдаагийн газрын дарга Ж.Энх-Одыг албан тушаалаас нь чөлөөлсөн хэмээн мэдэгдэв. Гэтэл Ж.Энх-Одыг Сэлэнгээс чөлөөлж, Баянголын цагдаагийн дэд даргаар тавьжээ.

Тодруулбал, Албан тушаалдаа хайнга хандаж чөлөөлөгдсөн хүний дүрд тоглосон Ж.Энх-Одыг орон нутгаас татан Нийслэлийн Баянгол дүүргийн Цагдаагийн хоёрдугаар хэлтсийн дэд даргаар сэлгэн томилжээ. 

Мөн Ж.Энх-Одтой цуг чөлөөлөгдсөн Сэлэнгэ аймгийн Цагдаагийн газрын Нийтийн хэв журам хамгаалах тасгийн дарга, цагдаагийн дэд хурандаа Л.Нандинбаатарыг Хан-Уул дүүргийн Цагдаагийн хоёрдугаар хэлтсийн хэв журмын ахлах байцаагчаар тус тус томилжээ.