?LIVE: Сэтгүүлч Н.Өнөрцэцэг: Олон нийтээс нуугаад байх зүйл байхгүй учир Талбай дээр ирж надаас мэдүүлгээ ав

Зариг.мн сайтын Ерөнхий эрхлэгч, сэтгүүлч Н.Өнөрцэцэгийг шүүхийн байгууллагын нэр хүндэд халдсан, шүүхэд нөлөөлсөн гэж Шүүхийн ерөнхий зөвлөл /ШЕЗ/-өөс прокурорын байгууллагад гомдол гаргасан. 

Тодруулбал, Хэнтий аймгийн шүүхийн хэлэлцсэн найман ишиг хулгайлсан гэх хэргийг сэтгүүлч Н.Өнөрцэцэг сурвалжилж, мөн иргэдийн индэр ажиллуулсан нь шүүхийн нэр хүндэд халдаж, нөлөөлсөн гэж буруутгажээ.

Өнөөдөр Нийслэлийн Чингэлтэй дүүргийн прокурорын байгууллагаас Н.Өнөрцэцэгийг яллагдагчаар татахаа мэдэгдэж, дуудан ирүүлэх прокурорын мэдэгдэх хуудас ирүүлсэн байна.

Улмаар өөрийг нь яллагдагчаар татсан прокурорын мэдэгдлийг эсэргүүцэж, Төв талбай дээр суулт зарлаад байгаа юм.

Н.Өнөрцэцэгийг суулт хийж байхад УИХ дахь АН-ын бүлгийн дарга О.Цогтгэрэл болон АН-ын гишүүд хүрэлцэн ирж дэмжиж байгаагаа илэрхийлэв. 

Сэтгүүлч Н.Өнөрцэцэг:

-Найман ишигний хэргээр хоёр хоногийн өмнө надаас сэжигтнээр мэдүүлэг авах гэсэн. Мэдүүлгээ дараа нь өгнө гэж хэлээд гарсан. Гэтэл өнөөдөр яллагдагчаар татсан прокурорын тогтоол гарсан байна. Шүүхэд нөлөөлсөн гэдэг нь иргэдийн индэр ажиллуулсан, тус хэргийг сурвалжилсан бичвэрүүдтэй холбоотой гэсэн. Миний хувьд намайг яллагдагчаар татсан цагдаа, прокурор, өргөдөл гаргасан шүүх ямар учир шалтгаанаар тогтоол гаргасан талаараа нээлттэй мөрдөн байцаалтаа явуулж, мэдүүлгээ авахыг хүсэж байна гэлээ.