Мэргэшсэн инженерүүдийн ур чадварыг сорьсон “Инженер, техникийн ажилтнуудын ур чадварын тэмцээн 2023” зохион байгуулагджээ. 

Олон суваг дамжуулагчдын холбоо санаачлан Мэдээлэл, Холбооны Технологийн сургуультай хамтран салбарын инженер, техникийн ажилтнуудын ур чадвар, авъяас билиг, оюун ухааныг сорьсон онол, практик хосолсон тэмцээн 2023 оны 5 дугаар сарын 27-ны өдөр зохион байгуулсан байна. Тэмцээнд холбооны гишүүн байгууллагууд болох Юнивишн, ДДэш, Эн Би Си, Шинэ Сансар, Мобинет, Монголсат нетворкс, Скаймедиа корпораци ХХК-иудын мэргэшсэн инженерүүд 2 хэсэгт хуваагдаж, 4 төрлөөр өрсөлджээ.

Энэхүү тэмцээн нь инженерүүдийн ур чадварыг дээшлүүлэх, харилцан туршлага солилцох, мэргэшсэн инженерүүдийн ажил мэргэжлийг олон нийтэд сурталчлан таниулах зорилготой. Мөн өрсөлдөөнтэй, мэдлэг мэдээлэл өгсөн, практик сургалт болсноороо илүү ач холбогдолтой юм.

Тэмцээний тэргүүн байрт ДДэш, удаах байрт Юнивишн, гуравдугаар байрт Шинэ Сансар компаниудын инженерийн баг шалгарчээ. Цаашид холбооны зүгээс тус тэмцээнийг жил бүр зохион байгуулахаар болсон байна.

---