ШҮҮХ: Д.Мөнх-Эрдэнэ 112 сая төгрөгийн хохирол учруулсан бөгөөд 82 сая төгрөгийг гаргуулж, улсын орлого болгоно

Консул асан Д.Мөнх-Эрдэнийн гэм бурууг шүүх хурал Нийслэлийн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд өчигдөр болсон. Түүнд холбогдох хэргийн гэм буруугийн дүгнэлтийг өнөөдөр танилцууллаа.

Энэ талаар “Д.Мөнх-Эрдэнэ нь БНХАУ-ын ӨМӨЗО-ны Хөх хотод Ерөнхий консулаар ажиллаж байхдаа Хөх Хотод суугаа Ерөнхий консулын амьдрах 76м хэмжээтэй гурван өрөө орон сууцаар хангагдсан. Гэсэн хэдий ч тус хотын “Сайхан дүүрэг” олон улсын хорооллын 10-р байрны 2-р орц 32 тоотод байрлах 200 метр талбай бүхий 3 өрөө орон сууцыг БНХАУ-ын иргэн н.Батаас түрээсэлж, гэрээ байгуулсан. Улмаар түрээсийн төлбөрт 247 мянган юань буюу 93 сая 138 мянга 240 төгрөгийг төсвийн хөрөнгөөс н.Батад олгосон.

Хөх хот дахь Хянган замын тусгай дунд сургуулийн зүгээс сургалтын төлбөр аваагүй байхад өөрийн хүүхдүүдэд сургалтын төлбөрт 42 мянган юань буюу 15 сая 433 мянга 320 төгрөгийг төлсөн мэтээр хуурамч баримт бүрдүүлэн, төсвийн хөрөнгөөс гаргуулсан. Ингээд өөрийн эхнэр Д. Баянжаргалд олгуулсан.

Дипломат төлөөлөгчийн газрын албан хэрэгцээнд ашиглаж байсан “Соната-7” маркийн тээврийн хэрэгсэл 2018 оны зургаадугаар сарын 28-н өдөр, Старекс маркийн тээврийн хэрэгсэл 2018 оны зургаадугаар сарын 21-ний өдөр тус тус БНХАУ-ын хэмжээнд зохион байгуулагдсан тээврийн хэрэгслийн шинэчилсэн бүртгэлд хамрагдсан байсан. Гэвч энэ ажлыг гүйцэтгүүлэх нэрийдлээр 2018 оны долдугаар сарын 1-ний өдрийн Б02 дугаар тушаалаар БНХАУ-ын иргэнийг ажиллуулж, 3000 юань буюу 1,081,830 төгрөгийг олгосон.

2018 оны аравдугаар сарын 10-ны өдөр Дэд Консул н.Батзоригт 6680 юань буюу 2,449,586 төгрөгийг олгож, 1,711,236 төгрөг олгохоос 738,346 төгрөг илүү олгож, А.Бямбаад 2018 оны наймдугаар сарын 31-ний өдөр 3724 юань буюу 1,348,054 төгрөг олгож, 1,048,002 төгрөг олгох байхад 300,047 төгрөг илүү олгосон.

Шүүгдэгч Д.Мөнх-Эрдэнийн үйлдлийн улмаас 112,248,865 төгрөгийн хохирол учирсан. Үүнээс Мөн-Эрдэнээс 82,263,785 төгрөгийг гаргуулж, улсын төсөвт олгохоор шийдвэрлэлээ. Д.Мөнх-Эрдэнийн гэмт хэрэг үйлдэж олсон орлого болох 10 сая төгрөгийг гаргуулж, улсын орлого болгоно” хэмээв. 

Тухайн гэм буруугийн шийдвэрийг танилцуулсны дараа шүүх хурал эрүүгийн хариуцлагын талаар хэлэлцэж эхлэв.