"Твиттер" олон нийтийн сүлжээний вэбсайтын лого бид бүгдийн сайн мэдэх цэнхэр шувуунаас "Dogecoin"-ы нүүр царай болох шиба инү нохойн зургаар солигдсоноос хойш тус криптовалютын үнэ 35 хувиар өсөж, нэг токен нь 0.09 ам.долларт хүрээд байна.

Харин "Твиттер"-ийн Гүйцэтгэх захирал Элон Маск энэхүү өөрчлөлтийг өмнө нь өгсөн амлалтынхаа дагуу хийж гүйцэтгэсэн гэх утгатай жиргээг нийтлээд байгаа билээ.

As promised pic.twitter.com/Jc1TnAqxAV

— Elon Musk (@elonmusk) April 3, 2023

Анх хошигнол маягаар эхэлсэн "Dogecoin" криптовалютыг ноён Маск хүчтэй дэмжсээр ирсэн бөгөөд төлбөр тооцооны чадвараараа биткойныг давж магадгүй гэж хэлж байсан удаатай. Гэвч одоо тэрээр "Dogecoin"-ыг сурталчлах зорилгоор пирамид схем буюу санхүүгийн луйвар үйлдсэн гэх хэрэгт буруутгагдаж, 258 тэрбум ам.долларын заргатай тулгараад байгаа юм. Түүний өмгөөлөгчид энэхүү нэхэмжлэлийг хүчингүй болгох хүсэлтийг өнгөрсөн долоо хоногт шүүхэд гаргасан.

Тэгвэл Элон Маск "Твиттер" платформ дээр "Dogecoin"-оор төлбөр тооцоо хийдэг болгохоор зэхэж буй гэх цуу яриаг энэ удаагийн үйлдэл нь улам өдөөгөөд байна.

Эх сурвалж: Yahoo! News

---