ОХУ-ын "Су-27" сөнөөгч онгоц болон АНУ-ын цэргийн дрон буюу нисгэгчгүй онгоц хооронд өнгөрөгч мягмар гарагт өрнөсөн үйл явдлыг Москва өдөөн хатгалга гэж үзэж буйг тус улсаас АНУ-д суугаа Элчин сайд Анатолий Антонов мэдэгджээ.

Тодруулбал, АНУ-ын цэргийн хүчний "MQ-9" ажиглалтын дрон олон улсын агаарын орон зайд нисэж байх үеэр Оросын хоёр сөнөөгч онгоц саад болохыг оролдож, хөдөлгүүрийг нь мөргөсний улмаас тус дрон Хар тэнгист осолдсон гэж Пентагон мэдээлсэн юм. Түүнчлэн, энэхүү ослоос өмнө Оросын нисгэгчид уг нисгэгчгүй онгоц дээр хэд хэдэн удаа түлшээ хаяж, "мэргэжлийн бус, хариуцлагагүй, байгаль орчинд халтай" үйлдэл гаргасан гэж АНУ-ын албаныхан буруушааж байна. Харин Кремлийн зүгээс Оросын сөнөөгч онгоцнууд огт ийм үйлдэл гаргаагүй бөгөөд тус дрон нь "огцом маневр хийсний улмаас осолдсон" гэж мэдэгджээ.

Тэгвэл АНУ дахь ОХУ-ын Элчин сайдын яамны албан ёсны цахим хуудаснаа нийтэлсэн мэдэгдэлдээ Элчин сайд Антонов "Америкийн нисгэгчгүй онгоц харилцаа холбооны хэрэгслээ санаатайгаар унтраан, Оросын нутаг дэвсгэрийн зүг өдөөн хатгасан байдлаар нисэж байсан" хэмээжээ. Түүнчлэн, АНУ-ын Төрийн департаментаас түүнийг дуудаж, энэ асуудлын талаар хэлэлцсэний дараа тэрээр Оросын хэвлэлүүдэд "Бид энэ үйл явдлыг өдөөн хатгалга гэж үзэж байна. АНУ-ын арми манай хилийн ойролцоо ийм төрлийн үйл ажиллагаа явуулж буй нь хүлээн зөвшөөрөх боломжгүй хэрэг бөгөөд түгшүүр төрүүлж байна. Тэд тагнуулын мэдээлэл цуглуулж, улмаар Киевийн дэглэм үүнийг ашиглан манай зэвсэгт хүчин, нутаг дэвсгэрт цохилт өгдөг" гэсэн байна.

Украины дайны улмаас ОХУ, АНУ-ын хооронд шууд сөргөлдөөн үүсэх эрсдэл нэмэгдэж байгааг энэхүү үйл явдал харуулсныг олон улсын шинжээчид онцлов.

Эх сурвалж: Reuters, BBC

---