Хүнд өвчнийг ялан дийлсэн Ш.Мөрфи аварга эргэн ирлээ

Мэргэжлийн снукер биллиардын чансаа олгох ээлжит Welsh Open тэмцээний шигшээд өрсөлдөх тамирчид тодорлоо. 

Энэ сарын 13-наас 19-ны хооронд Уэльсийн Лиандудно хотноо зохион байгуулагдаж буй 2023 оны Welsh Open тэмцээний эргэн тойронд өрнөж буй мэдээ, мэдээллийг тогтмол хүргэж байгаа билээ.

Урьд шөнө хагас шигшээ тоглолтууд явагдсан ба одоогоор тэмцээний хамгийн өндөр оноог аваад буй Шаун Мөрфи таамгийн дагуу шигшээд үлдлээ.

Хагас шигшээ эхний тоглолтод Ронни аваргыг буулган авсан БНХАУ-ын Тиан Пенфей болон Английн Роберт Милкинс нар өрсөлдөж Р.Милкинс өрсөлдөгчөө 6:2 харьцаагаар буулган авч хоёр дахь удаагаа дэлхийн чансаа олгох тэмцээний финалд шалгарлаа. Тэрээр мэргэжлийн снукер биллиардын 28 жилийн карьерынхаа оргилд хүрээд байгаа гэхэд хилсдэхгүй. Өнгөрсөн оны Гибралтар Опен тэмцээнд түрүүлсэн нь дэлхийн чансаа олгох тэмцээний финалд шалгарсан бөгөөд түрүүлсэн түүний анхны тохиолдол нь байлаа. 

Харин 2005 оны дэлхийн аварга Шаун Мөрфи сүүлийн жилүүдэд форм нь унаж снукерээс холдоод байсан ч ходоодны хүнд хагалгаанд орсны дараа жин хасаж улмаар хуучны шилдэг формндоо алхам алхмаар шилжиж байгаа нь анзаарагдаж байна. Хагас шигшээд Хятадын залуу тамирчин Пан Жунхуг 6:3 харьцаагаар буулган авлаа. Тэрээр Welsh Open тэмцээнд 2020 онд түрүүлж байсан ба 2006 онд дэд байранд орж байсан түүхтэй. 

Ийнхүү Welsh Open тэмцээний шигшээд Р.Милкинс болон Ш.Мөрфи нар тунан үлдлээ. Хоёр тамирчны хувьд өмнө нь 14 удаа учраа таарахад найман удаад нь Ш.Мөрфи аварга хожиж байсан ч хамгийн сүүлд буюу 2021 онд Р.Милкинс хожоод байгаа юм.