Засгийн газрын ээлжит бус хуралдаан /2022.12.09/ болж хэд хэдэн асуудлыг хэлэлцэн шийдвэрлэжээ. Хуралдаанаас гарсан шийдвэрийг ЗГХЭГ-ын дарга Д.Амарбаясгалан танилцууллаа.

Мэдээллийн дараа сэтгүүлчид сайд нараас асуулт асуув.

ХЗДХ-ийн сайд Х.Нямбаатар:

-Нүүрсний хулгайчдыг жагсагчид зарла гэж байгаа. Би АТГ-ын дэд дарга Г.Азжаргалыг зарим мэдээллийг ил болгож хэлэх болов уу гэж бодож байна. Жишээлбэл, "Эрдэнэс тавантолгой" ХК-ийн удирдлагад ажиллаж байсан Х.Нурлатын хамаарал бүхий компани нь Бүгд найрамдах Казахтсан улсын Алматы хотод тансаг зэрэглэлийн орон сууцны хороолол барьж байгуулсан гэх асуудлыг шалгаж байна.

Гэхдээ энэ хүнийг эцсийн байдлаар гэм буруутай гэж зарлаж болохгүй. Яг үүнтэй адил УИХ-ын тэр, тэр гишүүн гэж зарлах нь мөрдөн шалгах ажиллагаа явагдаагүй байхад зохимжгүй. 

Жагсагчдын шаардаж буй бас нэг асуудал нь УИХ тарах эсэх. Энэ асуудал нь Үндсэн хууль болон УИХ-ын тухай хуультай. УИХ-ын гишүүдийн дөрөвний гурав нь таръя гэж санал гаргавал тарж болно. Муу ч бай, сайн ч бай бид чинь төртэй улс. Тэнд нэг муу нүүрсний хулгайч жагсаал зохион байгуулахаар парламент тараад байж болохгүй. Хоёр том гүрний хувьд оршин буй манай улсад парламентийн засаглал өнө мөнхөд оршиж байж зэрэгцэн оршиж чадна гэдэгт би итгэлтэй байдаг хүн гэлээ. 

---