БНСУ-ын гал сөнөөгчид Дотоод хэргийн сайдаа шүүхэд өгчээ

Өмнөд Солонгосын нийслэл Сөүл хотын Итэвонд болсон шахцалдаантай холбогдуулан тус улсын гал сөнөөгчид Дотоод хэрэг, аюулгүй байдлын сайд И Санг Миний эсрэг албан ёсны гомдол гаргажээ.

Олон нийтийн аюулгүй байдлыг хариуцдаг И нь өнгөрөгч аравдугаар сарын 29-ний өдөр 158 хүний ​​амийг авч одсон харамсалтай ослоос урьдчилан сэргийлэх, цугласан олныг зохих ёсоор удирдах, үүссэн нөхцөл байдалд хариу арга хэмжээ аваагүй гэх шүүмжлэлд өртөөд байгаа билээ.

Тэгвэл тус улсын Төрийн ажилтны үйлдвэрчний эвлэлийн холбоонд харьяалагддаг гал сөнөөгчид Дотоод хэргийн сайд И Санг Миний эсрэг гомдлоо өнөөдөр /2022.11.14/ Үндэсний цагдаагийн газрын дэргэдэх бие даасан мөрдөн байцаах багт хүлээлгэн өгсөн байна. Гамшгийн менежмент, аюулгүй байдлын тухай хуулийн дагуу гамшгийн аюулгүй байдалд хяналт тавих үүрэгтэй И нь ажил үүргээ умартаж, хайхрамжгүй байдал гаргасны улмаас хүний амь нас хохирсон гэж буруутгаж буй гал сөнөөгчид түүнийг албан тушаалаасаа нэн даруй огцрохыг шаардаж байгаа юм.

Харин ноён И өнөөдөр өглөө Парламентын хуралдаанд оролцож, үүрэг хариуцлагаа биелүүлэхийн тулд чадах бүхнээ хийхээ мэдэгдсэн нь сөрөг хүчний хууль тогтоогчдын шүүмжлэлийг дагуулаад байна.

Эх сурвалж: Yonhap