БИЧЛЭГ: Рамзан Кадыров гурван хүүгээ Украины фронтод илгээнэ гэв

Бүгд Найрамдах Чечень Улсын удирдагч Рамзан Кадыров 14, 15, 16 настай гурван хүүгээ Украины фронтод илгээж, Оросын цэргүүдийн хамт тулалдуулна гэж мэдэгджээ.

ОХУ 18-аас доош насны хүүхдүүдийг дайн байлдааны ажиллагаанд шууд оролцохоос сэргийлэх тухай НҮБ-ын гэрээнд гарын үсэг зурсан билээ. Түүнчлэн Олон улсын эрүүгийн шүүх 15-аас доош насны хүүхдийг байлдааны ажиллагаанд ашиглахыг дайны гэмт хэрэг гэж үздэг ч Орос улс тус дүрмийн харьяаллыг хүлээн зөвшөөрдөггүй.

Тэгвэл Рамзан Кадыров өөрийн "Telegram" хуудаснаа нийтэлсэн мэдэгдэлдээ, эцэг хүн хөвгүүддээ гэр бүл, ард түмэн, эх орноо хэрхэн хамгаалахыг заах ёстой гэж бичсэн байна. Мөн хөвгүүд нь багаасаа цэргийн бэлтгэл сургуулилт хийж эхэлсэн ба жинхэнэ тулааныг мэдрэх цаг нь болсон гэж тэмдэглэсэн тэрээр гурван хүүгийнхээ сургуулилт хийж буй бичлэгийг хуваалцжээ. Чеченийн удирдагчийн ойр дотны хүмүүс Украин дахь цэргийн ажиллагаанд оролцоогүй гэж шүүмжилсэн "хоосон үгтэй хүмүүс"-т тэрээр мөн ийнхүү хариу барьсан аж.

Владимир Путин 2007 онд Рамзан Кадыровыг Чеченийн Ерөнхийлөгчөөр томилсноос хойш тэрээр Путины тууштай дэмжигч байсан бөгөөд Украин дахь дайн эхэлснээс хойш Чеченийн арми Оросын цэргийн хүчний хамт тулалдаж байгаа билээ. Гэвч Харьков, Донецк муж дахь цэргийн ажиллагаа тодорхой ялагдал хүлээсний дараа Кадыров Оросын армийн удирдлагыг шүүмжилж, Украины эсрэг илүү хатуу арга хэмжээ аван, тактикийн цөмийн зэвсэг хэрэглэхийг уриалсан. Харин Кремлийн зүгээс иймэрхүү шийдвэрийг сэтгэл хөдлөлөөр гаргаж болохгүй гэж мэдэгдсэн юм.

Эх сурвалж: BBC