Холимог хосын өрсөлдөөн ширүүхэн явагдлаа

Мэргэжлийн снукер биллиардын дэлхийн чансааг тэргүүлж буй Ронни О Сулливан, Жадд Трамп, Марк Селби, Нейл Робертсон нар эмэгтэйчүүдийн чансаагаар дэлхийд тэргүүлж буй дөрвөн эмэгтэй биллиардчидтай холимог хос болон өрсөлдсөн "World Mixed Doubles-2022" тэмцээн тун үзүүштэй болж өндөрлөлөө.  

Энэ сарын 24-25-ны өдрүүдэд дараах дөрвөн хос тойргоор өрсөлдөж Нейл Робертсон, Тайландын залуу биллиардчин Нутчарут Вонхарут нар түрүүллээ.  

• Дэлхийн долоон удаагийн аварга бөгөөд дэлхийн чансааг тэргүүлэгч домогт Ронни О Сулливан эмэгтэйчүүдийн дэлхийн 12 удаагийн аварга Рийн Эвансийн хамт. 
• 2019 оны дэлхийн аварга бөгөөд дэлхийн чансааны хоёрт эрэмбэлэгдэж буй Жадд Трамп эмэгтэйчүүдийн дэлхийн гурван удаагийн аварга Хонг Конгийн Он Еэгийн хамт
• Дэлхийн дөрвөн удаагийн аварга Марк Селби эмэгтэйчүүдийн дэлхийн чансааны гуравт эрэмбэлэгдэж буй Английн Ребекка Кеннатай хамт
• Тойргийн эхний хоёр тоглолтдоо дараалан ялагдал хүлээсэн 2010 оны дэлхийн аварга Нейл Робертсон эмэгтэйчүүдийн дэлхийн чансааны дөрөвт эрэмбэлэгдэж буй Тайландын залуу биллиардчин Нутчарут Вонхарут нар Жадд Трамп, Он Еэ нарыг 4:0 харьцаагаар буулган авч шигшээд шалгарсан юм. Харин нөгөө талаас Марк Селби, Ребекка Кенна нар нэг ч хожигдолгүйгээр шигшээд шалгарсан юм. 

Энэ удаагийн тэмцээнд Марк Селби, Ребекка Кенна нар үнэхээр сайн байсан хэдий ч эцсийн мөчид Нейл Робертсон, Нутчарут Вонхарут нар 4:2 харьцаагаар ялалт байгуулснаар "World Mixed Doubles-2022" тэмцээний аваргууд боллоо. Энэ жил анх удаа эмэгтэйчүүдийн дэлхийн аварга болсон 22 настай Тайланд бүсгүйн хувьд мэргэжлийн карьерынх нь томоохон эхлэл болж буйг тэмдэглэх хэрэгтэй. "World Mixed Doubles-2022" тэмцээний аваргууд тус бүр 30.000 фунт стерлингийн шагнал хүртсэн ба Нутчарут Вонхарутын хувьд энэ нь түүний хүртэж буй хамгийн өндөр шагнал болж байна.