Алтанбулаг боомтын шинэчлэлтийн ажил удаашралтай байна

Сэлэнгэ аймгийн Засаг дарга Н.Лхагвадорж өнгөрсөн долоо хоногт Алтанбулаг боомтод хоёр удаа очиж ажиллажээ.

Эхний удаа өөрийн биеэр газар дээр нь танилцаж, ажил гүйцэтгэгч аж ахуйн нэгжийн төлөөлөлтэй уулзсан бол хоёр дахь удаагаа чиг үүрэг бүхий мэргэжлийн байгууллагуудын хамтарсан ажлын хэсгийг ажиллуулж, нөхцөл байдлыг үнэлүүлэн, алдаа дутагдлыг арилгуулах, засаж сайжруулахаар ажилласан байна. 

Монгол Улсын Засгийн газраас хэрэгжүүлж байгаа “Хилийн үйлчилгээг сайжруулах бүс нутгийн төсөл”-ийн хөрөнгө оруулагч нь Азийн хөгжлийн банк бөгөөд тус банкны 6.0 сая ам.долларын хөнгөлттэй зээлээр энэхүү төсөл хэрэгжиж байна.

“Хилийн үйлчилгээг сайжруулах бүс нутгийн төсөл” буюу Азийн хөгжлийн банкнаас санхүүжүүлж байгаа Алтанбулаг хилийн боомтын шинэчилсэн төлөвлөлтийн хүрээнд:

• Зорчигч тээврийн 19 барилга,
• Ачаа тээврийн 18 барилга байгууламж,
• Дэд бүтцийн 5 барилга
• Ногоон байгууламж 6000м2
• Иж бүрэн инженерийн шугам сүлжээ зэрэг нэр бүхий ажлууд хийгдэхээр төлөвлөгджээ.

Өнөөдрийн байдлаар Алтанбулаг хилийн боомтын шинэчилсэн төлөвлөлтөд тусгагдсан ажлууд бараа материалын нийлүүлэлтээс шалтгаалж удаашралтай хийгдэж байгааг гүйцэтгэгчид хэлж байлаа.

Монгол Улсын хойд хил Алтанбулаг боомтын шинэчлэлтийн ажил ийнхүү хугацаа алдсан, гүйцэтгэл чанар тааруу байгааг аймгийн Засаг дарга шүүмжлэв. 

Харин Алтанбулаг хилийн боомтын тусгаарлах зурвас бүхий авто замын ажлын явц барилгын ажилтай харьцуулахад харьцангуй сайн байна. Замын ажлыг “НКВ ИНТЕРНЕШНЛ ХОЛДИНГ” ХХК гүйцэтгэж байгаа бөгөөд цементийн улмаас түр зогсолт хийснээ танилцуулахад Засаг даргын зүгээс 60 тонн цементийн асуудлыг газар дээр нь шийдвэрлэж өгснөөр ажлаа үргэлжлүүлэн гүйцэтгэхээр боллоо. Тус компани цементийн тасалдал үүсэхгүй бол замын ажлаа аравдугаар сарын 15 гэхэд дуусгана гэв.

Хүйтэн сэрүүний улирал эхлэх гэж байгаа энэ цаг үед хилийн боомтоор зорчих зорчигчид болоод тэнд ажиллагсдын орчин нөхцөл, цаашлаад боомтын үйл ажиллагааны хэвийн тасралтгүй байдлыг хангах нь анхаарах гол асуудал гэдгийг аймгийн дарга онцоллоо.

Засаг даргын зүгээс өнөөдөр /2022.09.12/ Эдийн засаг, хөгжлийн яам, Хууль зүй, дотоод хэргийн яаманд “Хилийн үйлчилгээг сайжруулах бүс нутгийн төсөл”-ийн хүрээнд хийгдэж байгаа ажлын явц байдлыг танилцуулан цаашид бүтээн байгуулалтын ажлыг үр дүнтэйгээр эрчимжүүлэн үргэлжлүүлэх талаар байр сууриа илэрхийлэх юм.

“Алтанбулаг хилийн боомтын барилга байгууламжийн өргөтгөл, шинэчлэлийн ажил”-ын ерөнхий гүйцэтгэгчээр “Монкон Констракшн” ХХК ажиллаж байгаа бол туслан гүйцэтгэгчээр “Цэлмэг очир констракшн” ХХК, “Хан Халдун” ХХК, “Хайберид” ХХК зэрэг компаниуд ажиллаж байна хэмээн Сэлэнгэ аймгийн ЗДТГ-аас мэдээлэв.