Дональд Трампын нягтлан бодогч нар түүнээс харилцаагаа тасалжээ
АНУ-ын Ерөнхийлөгч асан Дональд Трампын нягтлан бодох бүртгэлийн компани түүнтэй харилцаагаа тасалж, сүүлийн 10 жилийн санхүүгийн тайланд нь "итгэж болохгүй" гэж мэдэгджээ.
"Мазарс" компани нь 2011-2020 оны хооронд ноён Трампад зориулж бэлтгэсэн санхүүгийн мэдэгдлийнхээ ард зогсож чадахгүй гэдгээ "Трамп Байгууллага"-д илгээсэн захидалдаа тэмдэглэсэн байна. Мөн тус компани нь эдгээр баримтыг зөрүүтэй гэсэн дүгнэлтэд хүрээгүй ч цаашид ноён Трамптай хамтарч ажиллахгүй гэж онцолжээ.
Энэхүү захидал нь "Трамп Байгууллага"-ын залилангийн хэргийн шүүх хуурлын үеэр ил болсон бөгөөд "Мазарс"-ын нягтлан бодогчид ажлаа "мэргэжлийн стандартын дагуу" гүйцэтгэсэн ба Дональд Трампын өгсөн мэдээлэлд үндэслэн тайлангаа эмхэтгэсэн гэж мэдүүлсэн юм.
Нью-Йоркийн Ерөнхий прокурор Летитиа Жеймс Трампын гэр бүлийн фирмийг зарим эд хөрөнгөө хэт үнэлэн, зээл, даатгал, татварын хөнгөлөлт авахын тулд "хууран мэхлэх эсвэл төөрөгдүүлсэн хөрөнгийн үнэлгээ" ашигласан гэж буруутгаад байгаа юм. Тэрээр Ерөнхийлөгч асан болон түүний охин Иванка нарыг мэдүүлэг өгөхийг хүсэж байгаа ба хүү Эрик Трампыг нь аль хэдийн байцаажээ.
Харин Дональд Трампын өмгөөлөгчид хатагтай Жеймсийн хүсэлтийг цуцлахыг оролдож байгаа ба мөрдөн байцаалтыг тэр чигээр нь зогсоохоор шүүхэд хандаад байна.
Эх сурвалж: BBC
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.