Хөгжлийн банкны асуудлаар Авлигатай тэмцэх газар /АТГ/-аас мэдээлэл өгч байна.

Хөгжлийн банкны 20 зээлдэгч 520 тэрбум төгрөгийг зориулалтын бусаар зарцуулсан талаар өчигдрийн Засгийн газрын ээлжит хуралдаанаар зарласан. Энэ талаар Хууль зүй, дотоод хэргийн дэд сайд Б.Солонгоо "28 зээлдэгчийн 1 их наяд төгрөгийн зээлийг шүүхэд, 14 зээлдэгчийг шалгуулахаар хууль хягалтын байгууллагад өгсөн бол 10 зээлдэгчийг АТГ-т шалгуулахаар өгсөн" хэмээн мэдээлж байв.

Авлигатай тэмцэх газрын Хэвлэл мэдээлэл, олон нийттэй харилцах төвийн ажилтан Н.Тэмүүлэн:

-Хөгжлийн банкнаас 2022 оны 1-р сарын 28-ны өдөр ирүүлсэн гэмт хэргийн талаарх гомдол, мэдээллийг үндэслэн хэрэг бүртгэлийн хэрэг нээн шалгаж, мөрдөн шалгах ажиллагааг эхлүүлсэн. Одоогийн байдлаар Хөгжлийн банкнаас ирүүлсэн, хугацаа хэтэрсэн чанаргүй ангилалд багтсан 52 зээлийг Хөгжлийн банкны тухай хуулийн дагуу олгосон эсэх, зээл олгосон албан тушаалтнууд нь эрх мэдэл, албан тушаалаа урвуулан ашигласан эсэх, тухайн зээлдэгчид давуу байдал олгосон эсэх, мөн хахууль авсан эсэх, улсад хохирол учруулсан эсэх зэргийг байгуулагдсан ажлын хэсэг шалгаж байна.

Мөрдөн шалгах ажиллагаа эхэлснээс хойш энэ хугацаанд нийт 8.5 тэрбум төгрөгийн зээл эргэн төлөгдсөн байна.  Хөгжлийн банкны зээлтэй холбоотойгоор Б.Ундармаагийн хамаарал бүхий "Гантиг вилла" хотхоны 9 блок барилгыг битүүмжилсэн тул худалдан авахгүй байхыг иргэддээ сэрэмжлүүлж байна. 

Ажлын хэсэг байгуулагдсанаас хойш найдваргүй зээлдэгчдийн 124 тээврийн хэрэгсэл, нэг үйлдвэрийн барилга, нэг лиценз, 186 үл хөдлөх хөрөнгө, 13 дансыг битүүмжилж захиран зарцуулах эрхийг нь хязгаарлах арга хэмжээ аваад байна. 

52 чанаргүй зээлийн асуудлаас өмнө АТГ-т ирсэн Улсын баатар, хотын дарга асан Э.Бат-Үүл нарын 11 хүнд холбогдох хэргийг мөрдөн шалгаад, анхан шатны шүүхэд шилжүүлсэн.

Хэрэв тухайн 52 чанаргүй, хугацаа хэтэрсэн зээлийн ард УИХ-ын гишүүн зээл авахад нөлөөлсөн бол хуулийн дагуу УИХ-д хандаж тухайн гишүүний бүрэн эрхийг түдгэлзүүлэх арга хэмжээ авна.

ХХБ, "Хөтөл" ХХК, "Кью Эс Си" зэрэг компаниас гаднах бусад ААН-ийн зээлийн мэдээллийг АТГ-ын албан ёсны сайтад удахгүй оруулна гэв.

---