Төв Азийн олон сая хүн тог цахилгаангүй болжээ

Киргиз, Узбекистан, Казахстан улсуудын дундын цахилгааны шугам тасалдсаны улмаас томоохон хотуудын олон сая оршин суугч хэдэн цагийн турш тог цахилгаангүй болжээ.

Энэхүү ослын улмаас уг гурван улс даяар замын түгжрэл үүсэж, нийтийн тээврийн үйлчилгээ, шатахуун түгээх станц болон нисэх онгоцны буудлын үйл ажиллагаанд саатал гарсан байна. Мөн зарим бүс нутгийн иргэд крантны ус, халаалтгүй болж, интернэт холболт нь тасарчээ. Нөхцөл байдал өнгөрөгч мягмар гаргийн өглөө эхэлсэн бөгөөд тухайн өдрийн орой гэхэд ихэнх хэсэгт цахилгааныг сэргээсэн гэж албаныхан мэдээлсэн юм.

Эдгээр гурван улсын эрчим хүчний сүлжээ нь хоорондоо уялдаа холбоотой байдаг ба Казахстанаар дамжин өнгөрдөг цахилгаан шугамаар ОХУ-ын сүлжээнд холбогддог аж.

Гэнэтийн ослын үед энэхүү сүлжээнээс эрчим хүч татах боломжтой хэдий ч "Тодорхой хэмжээний тэнцвэргүй байдлын улмаас цахилгаан эрчим хүчний урсгал огцом нэмэгдэж, холболт тасарсан" гэж сүлжээний оператор "KEGOC" мэдэгджээ.

Казахстаны хамгийн том хот болох Алматыд метронууд газар доорх хонгилд гацсан бол Узбекистаны нийслэл Ташкент хотын гэрлэн дохионы систем ажиллагаагүй болж, хэд хэдэн авто осол гарсан байна. Мөн Узбекистаны хамгийн том цанын баазад цаначид дүүжин тээврийн бүхээг дотор гацсан гэх мэдээлэл байгаа юм.

Энэ удаагийн явдал нь 1970-аад онд баригдсан цахилгааны шугамын найдвартай байдлын талаарх асуудлыг дахин анхаарлын төвд авчирч байна. Тус бүс нутагт усан цахилгаан станцын эрчим хүчийг ашигладаг боловч ган гачгийн улмаас хүндрэлтэй байгаа юм. Мөн Киргиз, Узбекистан, Казахстан, Туркменистан, Тажикстан гэх хуучин Зөвлөлтийн орнуудын хооронд баялгийн хуваарилалтын талаар хэд хэдэн дипломат маргаан гараад байгаа билээ.

Эх сурвалж: BBC