Индонез улс шинэ нийслэлээ Нусантара гэж нэрлэжээ

Индонезийн нийслэл Жакарта хот хурдацтай живж байгаагийн улмаас тус улсын эрх баригчид шинэ нийслэл байгуулахаар шийдвэрлэсэн бөгөөд Нусантара гэх нэрийг сонгожээ.

Шинэ нийслэлийг Жакартагаас 1,300 км-ийн зайд орших Борнео арал дээр байгуулах саналыг анх 2019 онд дэвшүүлсэн байна. Гэвч энэхүү алхам нь мөн байгаль орчны хүчин зүйлийг харгалзаж үзээгүй бөгөөд шинэ нэр нь будилаантай байж магадгүй гэж шүүмжлэгчид үзэж байгаа юм.

Жакартагийн хөл хөдөлгөөн, агаарын бохирдол болон замын түгжрэл хэрээс хэтэрсэн бөгөөд гүний усыг хэтрүүлэн олборлосны улмаас хурдацтай живж байгаа билээ. 10 сая гаруй хүн амтай тус хот нь Жава арлын намаг бүхий газарт байрладаг юм.

Тэгвэл нийслэлээ Борнео арал дээрх Зүүн Калимантан муж руу нүүлгэн шилжүүлснээр энэхүү асуудлыг шийдвэрлэж чадна гэж Индонезийн удирдлагууд найдаж байна.

Уг төсөл нь ойролцоогоор 32.4 тэрбум ам.долларын өртөгтэй байх бөгөөд тус улсын Засгийн газрын хэрэгжүүлсэн хамгийн том дэд бүтцийн төслүүдийн нэг болох аж.

Эх сурвалж: BBC