БИЧЛЭГ: Казахстаны иргэд шатахууны үнийн өсөлтийн улмаас жагсаж байна

Казахстаны эрх баригчид шатахууны үнийг нэмсний улмаас тус улсын хэд хэдэн томоохон хотод олон мянган иргэн эсэргүүцлийн жагсаал зохион байгуулжээ. Улмаар жагсагчид болон цагдаа нарын мөргөлдөөн хурцадсан тул Ерөнхийлөгч Касым-Жомарт Токаев зарим бүс нутагт хоёр долоо хоногийн онц байдал зарласан байна.

Тодруулбал, эрх баригчид шингэрүүлсэн хийн үнийн дээд хязгаарыг цуцалсны улмаас шатахууны үнэ хоёр дахин өсөхөд хүрсэн бөгөөд үүнийг эсэргүүцсэн иргэд олноороо жагссан аж. Тус улсын хамгийн том хот болох Алматыд өнгөрөгч мягмар гаргийн шөнө хэдэн мянган жагсагч цугларч, гудамж дахь автомашинуудыг шатааж эхэлсний дараа цагдаа нар тэднийг тараахын тулд нулимс асгаруулагч хий ашиглажээ. Энэхүү мөргөлдөөний үеэр хэд хэдэн цагдаагийн алба хаагч гэмтэж бэртсэн гэж орон нутгийн хэвлэлүүд мэдээлсэн байна.

Харин Ерөнхийлөгч Токаев Засгийн газрын байр руу халдсан жагсагчдын үйлдлийг "туйлын хууль бус" гэж тодорхойлсон бөгөөд Алматы хот болон Мангистау мужид онц байдал зарлаж буйгаа мэдэгдсэн юм. Уг арга хэмжээний хүрээнд, шөнийн цагаар хөл хорио тогтоох бөгөөд олон нийтийн цугларалт хийхийг хориглох аж. Мөн орон даяар интернэт холболт тасарсан гэх мэдээлэл байгаа юм.

Түүнчлэн, Казахстаны Засгийн газар өнөөдөр хуралдаж, "улс орны тогтвортой байдлыг хангахын тулд" шатахууны үнийг бууруулна гэж Ерөнхийлөгч Токаев зарласан бөгөөд жагсагчдыг хариуцлагатай хандахыг уриалсан хэдий ч эсэргүүцлийн хөдөлгөөн үргэлжилсээр байна.

Эх сурвалж: BBC