Санаачлагч Э.Одбаяр, Д.Монголхүү нар нийтийн сонсголдоо ирсэнгүй

Жагсаал, цуглаан хийх журмын тухай хуулийн хэрэгжилтийн талаар өнөөдөр нийтийн сонсгол зохион байгуулж байна.

Хуулийн хэрэгжилт, алдаа оноо, тулгамдаж байгаа асуудал зэргээр мэдээлэл өгөхөөр холбогдох байгууллагын төлөөлөл, албан тушаалтнууд нийтийн сонсголд оролцож байгаа юм. Тиймээс өнөөдрийн сонсголоор хууль дахь тодорхойлолтыг өөрчлөхөөс эхлээд төрийн зохицуулалт, цагдаа хүчний байгууллагын оролцоо, түүний хүрээ хязгаар, хэвлэл мэдээллийнхний оролцоо, тэднийг хамгаалах, эрх үүргийн талаар төрийн холбогдох албаны төлөөллүүд болон оролцогчид хуулийг сайжруулах, гарц, гаргалгааг хэлэлцэхээр цугласан.

Тодруулбал, 3 ажиглагч, 18 оролцогч, төрийн байгууллагуудын төлөөллүүд оролцохоор болсон. Гэвч сонсгол зохион байгуулахыг санаачилж, уриалга гаргаж, хэвлэл мэдээллийн хэрэгслээр шаардаж байсан санаачлагчид болох Э.Одбаяр, Д.Монголхүү тэргүүтэй төлөөллүүд нийтийн сонсголд ирсэнгүй.

Энэ талаар УИХ-ын гишүүн Н.Учрал “18 оролцогчоос 10 оролцогч ирсэн байна. Сонсголыг хуулийн дагуу зарлаад, бүртгэнэ гэдгийг удаа дараа мэдээлэл хүргүүлсэн. Гэвч хуулийн хэрэгжилтийг нь ярьж, холбогдох албан тушаалтнуудыг оролцуулъя гэхээр ирдэггүй. Хэвлэл харахаараа олон юм ярьдаг” гэж буруушаалаа. 

Харин Д.Монголхүү, Э.Одбаяр нар өнөөдөр 13:00 цагаас "УИХ хууль зөрчиж байна" сэдвээр хэвлэлийн бага хурал зарлалаа. Тус хуралд "No double standard", "Тэвчээр тасарлаа", "Монгол туургатан төв холбоо" зэрэг иргэдийн хөдөлгөөн оролцоно гэх тов гараад байна.