"Рио Тинто" компани түрэмгий арга барилаа зөөлрүүлсэн гэв

"Рио Тинто" компанийн Гүйцэтгэх захирал Якоб Стаусхольм Монгол Улсын Засгийн газрын өмнө буулт хийж, түрэмгий арга барилаа зөөлрүүлсэн талаар "Ройтерс" агентлаг мэдээлжээ.

Стаусхольм Оюутолгойн зэсийн уурхайн бүтээн байгуулалтад ахиц гаргасны хариуд Монголын төрөөс авах ёстой 2.3 тэрбум ам.долларын өрийг тэглэх санал тавьсан болохыг тус нийтлэлд онцолсон байна. Ингэснээр тус компани нь илүү том шагналын эзэн болж магадгүй гэжээ.

Уурхайн хоёр дахь гол үе шат эхэлсний дараа, Оюутолгой дэлхийн дөрөв дэх том зэсийн уурхай болох замдаа орох бөгөөд тус металлын үнэ огцом өссөн энэ үед энэ нь сайхан мэдээ юм. Гэвч уг төсөл хоёр жил орчмоор хоцорч байгаа ба үүнд буруу удирдлага буруутай гэж шинжээчид үзэж байгаа аж.

Якоб Стаусхольм эхлээд зээлийн хүүг бууруулах санал тавьсан хэдий ч эцэст нь Монгол Улсын Ерөнхий сайд Л.Оюун-Эрдэнэ ялагч болсон гэж нийтлэлд бичжээ. Хамгийн муу нөхцөл байдал үүссэн тохиолдолд, Монгол Улс "Рио Тинто"-г төслөөс хасан, "Туркойз Хилл" компанийн долоон тэрбум ам.долларын хөрөнгө оруулалтыг эрсдэлд оруулж болзошгүй байсан юм. Тиймээс тус компанийн зүгээс буулт хийсэн байна.

Энэ шийдвэрийн үр дүнд, "Рио Тинто" ирээдүйд Монголоос авах байсан олон тэрбум ам.долларын хүүгээс татгалзаж байгаа хэдий ч уг төсөл хэрэгжихгүйгээр анхнаасаа өрөө барагдуулах боломж байгаагүй юм.

Харин Оюутолгойн төсөл үргэлжилснээр маш их хэмжээний орлого авчирах нь тодорхой. Тус уурхай нь цаашид 30 жилийн хугацаанд дунджаар 350 мянган тонн зэс үйлдвэрлэх боломжтой бөгөөд одоогийн зах зээлийн үнээр нэг тонн нь 9,000 ам.доллар гэж үзвэл жилийн цэвэр ашиг нь хоёр тэрбум гаруй ам.доллар болох юм. Тэгэхээр илүү зөөлөн арга барил нь хоёр талд илүү ашигтай гэдэг нь харагдаж байгааг "Ройтерс" агентлаг дүгнэжээ.

Эх сурвалж: Reuters