Омикрон хувилбар олон нийтийг түгшээж байгаатай холбогдуулан вакцины үр нөлөө болон цаашид манай улс ямар арга хэмжээ авах талаар “Оном” сангийн ерөнхий захирал, анагаах ухааны доктор Д.Наранжаргалаас тодрууллаа.

Тэрээр вакцины нэмэлт тунд хамрагдсанаар эсрэг биеийн түвшинг нэмэгдүүлж, халдвараас болон өвчлөлийн хүндрэлээс бүрэн сэргийлэх боломжтой гэж хэлж байна.

Д.Наранжаргал: Бид нарын хэрэглэж байгаа бүх төрлийн вакцин ямар нэгэн байдлаар хувьсан өөрчлөгдөж, мутацлагдаж байгаа вирусийн эсрэг ажилладаг гэсэн үг. Хүний эсрэг биетийн түвшин өндөр байх тусам халдварт өвчинд өртөхгүй байх. Цаашлаад өвчлөлийн хүндрэлээс сэргийлэх боломжтой. Одоогийн байдлаар Омикрон хувилбар манай улсад зөөвөрлөгдөн орж ирэх нь цаг хугацааны асуудал. Өмнөд Африкт тархаж байгаа хурдаар явах юм бол манай улсад ирэх оны нэг, хоёрдугаар сард зөөвөрлөгдөн орж ирэх магадлалтай. Гэхдээ иргэдийн хувьд урьдчилан сэргийлэх хамгийн гол арга бол нэмэлт тунгийн вакцинд хамрагдах.

Учир нь гэвэл эсрэг биетийн түвшин өндөр байх тусам халдвар авах магадлал өндөр байдаг. Иймд вакцины 1, 2 тундаа хамрагдаад 3 сар болсон бол заавал нэмэлт тундаа хамрагдахыг зөвлөж байна.

---